بے گناہ کشمیری تیا ظلم و کشت و خون ءِ اسہ دورشم اسے ٹی ہم منپنہ، کشمیر نا بارواٹی جہانی رائے عامہ ترندی اٹ بدل مننگ ءِ ،

انسانی حق انا خلاف ورزی تا جاست وپاست کن فیکٹ فائنڈنگ مشن مقبوضہ کشمیر آ گدریفنگ کن اقوام متحدہ تون رجوع کینہ پاک اوغان ڈی جی ایم اوز نا نیام اٹ اوڑدہی بروک آ تو کابل اٹی مریک سلاہکار خارجہ سرتاج عزیز نا دفتر خارجہ ٹی پریس بریفنگ

بے گناہ کشمیری تیا ظلم و کشت و خون ءِ اسہ دورشم اسے ٹی ہم منپنہ، کشمیر نا بارواٹی جہانی رائے عامہ ترندی اٹ بدل مننگ ءِ ،
 انسانی حق انا خلاف ورزی تا جاست وپاست کن فیکٹ فائنڈنگ مشن مقبوضہ کشمیر آ گدریفنگ کن اقوام متحدہ تون رجوع کینہ پاک اوغان ڈی جی ایم اوز نا نیام اٹ اوڑدہی بروک آ تو کابل اٹی مریک سلاہکار خارجہ سرتاج عزیز نا دفتر خارجہ ٹی پریس بریفنگ

اسلام آباد۔ (پاکستان پوائنٹ نیوز۔21 جولائی۔2016) سلاہکار خارجہ سرتاج عزیز اسہ وار ولدا مقبوضہ کشمیر اٹی بھارتی ظلم انا سخت مذمت ءِ کرسا بھارت آ صفاکرینے کہ ہراتم ہم جامع مذاکرات مس ، کشمیر آ ہیت ضرور مریک، بھارت کشمیری الس نا توارءِ توننگ کن ریاستی دہشت گردی نا بناءِ کرینے۔ مقبوضہ کشمیر اٹی بے گناہ کشمیری تیا ظلم و کشت وخون ءِ اسہ دروشم اسے ٹی منپنہ، کشمیر اٹی بھارتی ظلم آن گڈ جہانی رائے عامہ ترندی اٹ بدل مننگ ءِ۔

کشمیری الس نا حق خودارادیت نا خواست ءِ واک انا زوراٹ توننگ ریاستی دہشت گردی ءِ۔ کشمیر ءِ تہہ نا معاملہ گوندنگ اقوام متحدہ نا قرارداد آتا خلاف ورزی ءِ۔ غٹ سیاسی جماعت آتون اوار کل قوم کشمیری تتون یکجہتی نا درشانی ٹی شریک ءِ۔ 1990ء نا تحریک آن گڈ اولیکو وار کشمیر نا ویل جہانی توجوہ دوئی کرینے، مقبوضہ کشمیر تدوک آ 13دے آن بند تموک ءِ۔ کشمیری کسرشون سید علی گیلانی نا چارٹکی فارمولہ نا پبی مخ تفی ءِ کینہ۔

داہیت آتے پنچ شنبے آ او دفتر خارجہ ٹی پریس بریفنگ نا وخت آ کرے۔ سلاہکار خارجہ مقبوضہ کشمیر اٹی ساڑی آ حالیت آتا بابت اسہ سوج اسینا ورندی ءِ ترسا پارے کہ نن بھارت تون تعلقداری تے معمول آ ہتنگ خوانہ ولے نن بھارتی حکومت آ واضح کرینن کہ ہراتم ہم جامع مذاکرات مریک تو کشمیر نا ویل آ ضرور ہیت مریک۔ 1990 ء آن گڈ اولیکو وار مقبوضہ کشمیر اٹی حالیت آک ہنداخہ سنجیدہ مسنو۔

ساڑی آ بھارتی ظلم و پاکستان نا کوشست آتیان کشمیر نا ویل ءِ جہانی کہول آ تالان مسنے اقوام متحدہ ، او آئی سی ، افریقی یونین و یورپی یونین تون اوار ایلو جہانی ادارہ و انسانی حق انا تنظیمک مقبوضہ کشمیر اٹی بھارتی فوج انا ظلم انا مذمت و اوفتیا بھاز گڑتی ظاہر کرینے۔ سلاہکار خارجہ پارے کہ مقبوضہ کشمیر اٹی بے گناہ کشمیری الس آ بیدادی، لس کشت و خون، ہسپتال و ایمبولینس آتیا جلہو ءِ اسہ دروشم اسے ٹی ہم منپنہ۔

ریاستی دہشت گردی و انسانی حق انا خلاف ورزیک کشمیری الس ءِ حق خودارادیت نا دوئی نا جہد آن توننگ کپسہ۔ اوپارے کہ بھارتی انسانی حق انا تنظیم ، میڈیا و مسکوہی بھارتی وزیر داخلہ ہم کشمیری الس آ بھارتی فورسز آتا ظلم انا مذمت ءِ کرینے، مسکوہی بھارتی وزیر داخلہ نا پاننگ ءِ کہ بھارت کشمیر ی تتون کروک آ وعدہ غاتے پورو کتو و دا ویل واک اٹ آخا ہیت وگپ اٹ ایسر کننگ مریک ۔

سرتاج عزیز اسہ سوج اسینا ورندی ءِ ترسا پارے کہ پاکستان کشمیر نا ویل ءِ غٹ جہانی فورمز آتیا چست کرینے۔ پیشن نا ملک آتے ٹی پاکستانی مشن تسلسل آن کشمیر نا ویل ءِ تالان کننگ ءِ۔ اوپارے کہ بھارت نا کنڈآن کشمیر ءِ اندرونی معاملہ گوندنگ اقوام متحدہ نا قرارداد آتا خلاف ورزی ءِ۔ حق خودارادیت ءِ واک انا زوراٹ توننگ ریاستی دہشت گردی ءِ۔ سلاہکار خارجہ پارے کہ انسانی حق انا خلاف ورزی تا جاست وپاست کن فیکٹ فائنڈنگ مشن مقبوضہ کشمیر گدریفنگ کن اقوام متحدہ تون رجوع کینہ۔

اوپارے کہ بھارت تون سفارت تعلقداری منقطع کننگ آن معاملہ ایسر مفک نن بھارت آ جہانی زور ءِ ودفنگ خوانہ۔ اسہ سوج انا ورندی ءِ ترسا سلاہکار خارجہ پارے کہ وزیراعظم نواز شریف و اونا بھارتی ہم منصب مودی نا نیام اٹ تعلقداری تے ذاتی تعلقداری پاننگ غلط ءِ ، ہڑتوم آ کسرشون تا نیام اٹ تعلقداری ریاست و ریاست نا نیام اٹ تعلقداری تا بشخ ءِ۔ اوپارے کہ کشمیر اٹی بھارتی ظلم آن گڈ جہانی رائے عامہ ترندی اٹ بدل مننگ ءِ۔

کشمیر اٹی ساڑی آ گچین کاری نا بابت آن اسہ سوج اسینا ورندی ءِ ترسا اوپارے کہ آزاد کشمیر اٹی گچین کاری بے کچ پرامن و شفاف وڑاٹ مننگ ءِ ، غٹ سیاسی جماعت آک اوٹی شریک ءُ وخت اس کہ مقبوضہ کشمیر اٹی آل پارٹیز کانفرنس ہمیش نام نہاد گچین کاری تا بائیکاٹ ءِ کرے۔ آزاد کشمیر نا گچین کاریک مقبوضہ کشمیر نا گچین کاری تانعم البدل مننگ کپک ۔ اوغانستان نا بابت اسہ سوج اسینا ورندی ءِ ترسا اوپارے کہ اوغانستان اٹی امن کن چار کڑدہ ہی گروپ نا کوشست آک برجاء سلرہ ۔

ننا کوشست ءِ کہ تیرمہ آن گڈ طالبان و اوغان حکومت ءِ مذاکرات آ آمادہ کین۔ اوپارے کہ پاک اوغان سیم آ بارڈر مینجمنٹ نا بابت ہڑتوم آ ملک آتا ڈی جی ایم اوز نا نیام اٹ اوڑدہی بروک آ تُو کابل اٹی مریک۔ دیوان اٹی بارڈر مینجمنٹ نا غرض آن میکنزم اس طے کننگک۔ داکان مست دفترخارجہ نا ترجمان محمد نفیس زکریا نا ہمشیرہ نا کذیت آ اونابخشش کن دعا کننگا۔