بنجائی وزیر داخلہ چوہدری نثارعلی خان نا برطانیہ نا مسکوہی وزیراعظم ڈیوڈ کیمرون تون اوڑدہی

بنجائی وزیر داخلہ چوہدری نثارعلی خان نا برطانیہ نا مسکوہی وزیراعظم ڈیوڈ کیمرون تون اوڑدہی

لندن(پاکستان نیوز پوائنٹ 16نومبر2016ء) بنجائی وزیر داخلہ چوہدری نثارعلی خان برطانیہ نا مسکوہی وزیراعظم ڈیوڈ کیمرون تون لندن اٹی اوڑدہی کرے۔ اوڑدہی نا وخت ہڑتوم آ راہشونک پاک۔ برطانیہ ہڑتوم آ کنڈآتا تعلقداری، ڈیہہ نا حالیت آتون اوار ایلو تین پہ تینی است خواہی نا معاملہ غاتیا درشانِ خیال کریر۔ ترجمان وزارت داخلہ نا رداٹ داوخت آ وزیرداخلہ چوہدری نثارعلی خان ڈیوڈ کیمرون نا تاریخی بیان”پاکستان نا دوست برطانیہ نا دوست و پاکستان نا دشمن برطانیہ نا دشمن ءِ“ نا حوالہ ءِ ترسا پارے کہ پاکستان نا الس ڈیوڈ کیمرون نا بھاز شرف ءِ کیک۔

اوتینا دور اٹی پاک ۔ برطانیہ تعلقداری تے پوسکن آ بڑزی تسکان سرکننگ کن پبی کڑد ادا کرے۔ وزیر داخلہ ڈیوڈ کیمرون تون پارے کہ پاکستان اٹی جمہوریت ، ادارہ خاص کر پاکستان نا الس کن اونا کمکاری اسہ سچا ءُ سنگت ملک اسے نا وڑاٹ ہمیشہ یات تخنگک۔ ترجمان نا رداٹ اوڑدہی نا وخت ہڑتوم آ راہشونک پاک۔ برطانیہ تعلقداری تا بارواٹی درشانِ خیال کریر و کیہی بشخ آتیٹی ہدف آتادوئی کن پیش رفت نا ہم جاچ ءِ ہلکر۔ مسکوہی وزیراعظم برطانیہ ڈیہہ و خاص کر اوغانستان اٹی سوگوی کن پاکستان نا کوشست آتا ستاءِ کرے۔ اوپارے کہ او پاک۔ برطانیہ تعلقداری تے پین سوگو جوڑ کننگ کن تینا ذاتی حیثیت اٹ کڑد ادا کرسا کیک۔ اوپاکستان نا الس و حکومت کن آخبت اٹی نیک است خواہی تا درشانی ءِ کرے۔