اقوام متحدہ(پاکستان پوائنٹ نیوز۔20 جولائی۔2016) اقوام متحدہ سوگو شون نا ہدف آتا بارواٹی اولیکو رپورٹ جاری کرے۔ داوخت آ جہانی ادارہ نا سیکرٹری جنرل بان کی مون پارے کہ 15سالہ ہدف آتا دوئی آ کاریم نا بناء گچین ءِ و دا ہدف آتا دوئی کن اقوام متحدہ نا غٹ ذیلی ادارہ غاتے اواری اٹ کاریم کروئی مریک۔ اقوام متحدہ نا بڑزکو کہول نا سیاسی فورم آن تران نا وخت آ اوپارے کہ سوگو شون نا ہدف آتے دوئی کننگ کن گام گیج آتیان نن اسہ تاریخی و یات گار سفر نا بناءِ کرینن۔
دا سفر ءِ پورو کننگ کن ننے حکومت ، ہندی ادارہ و اقوام متحدہ تون اوار ہر کہول آ جتا وڑاٹ سجفوئی مریک و شون نا غٹ بشخ بشمول ماحولیات، معیشت ءِ مربوط کروئی مریک واوٹی حکومت آتون اوار اوار نجی بشخ ءِ ہم تینا پبی کڑد ءِ ادا کروئی مریک۔ رپورٹ نا رداٹ اینو ہم دنیا ٹی ہر 8آن اسہ انسان بے کچ نیزگاری ٹی زند تدیفنگ آ مجبور ءِ۔ 80کروڑ بندغ فاقہ کشی نا گواچی ءُ ، 5سال نا وئی اسکان نا اسہ چوتھائی چناتا رجسٹریشن متنے۔
اسہ ارب 10کروڑ بندغ آتے بجلی نا آسراتی دواف وخت اس کہ 2ارب بندغ دیر انا کاختی آن زہمی ءُ۔ داوخت آ مچ آ دنیا نا ملک آتیان چاگڑد نا رکھ انا پوسکن آ جہانی معاہدہ پیرس ایگریمنٹ نا توثیق نا ہم خواست کننگا۔ یات سلے کہ 40ملک آک اینخو ناسال انا آخر اسکان دامعاہدہ نا توثیق کننگ نا وعدہ کرینے۔
