ڈونلڈ ٹرمپ 276الیکٹورل وونٹ ہلسا امریکہ نا 45می صدر گچین ہیلری کلنٹن فون کرسا مبارکبادی تس

ڈونلڈ ٹرمپ 276الیکٹورل وونٹ ہلسا امریکہ نا 45می صدر گچین ہیلری کلنٹن فون کرسا مبارکبادی تس

واشنگٹن (پاکستان نیوز پوائنٹ 9نومبر2016ء) امریکی اپوزیشن جماعت نا اومیت دار ڈونلڈ ٹرمپ 276الیکٹورل وونٹ ہلسا امریکہ نا 45می صدر گچین مس۔ ارب پتی پوریا گر و ریئلٹی ٹی وی اسٹار ڈونلڈ ٹرمپ حکمران جماعت ڈیموکریٹک پارٹی نا اومیت دار و مسکوہی خاتون اول ہیلری کلنٹن ءِ شکست ترسا مچ آ دنیا و امریکہ ٹی رائے عامہ نا جاچ آتے غلط ثابت کرے۔ ہیلری کلنٹن ءِ امریکہ نا بے کچ قطبی و بے کچ سویلی ریاست آتیٹی سرسہبی دوئی مس و او218الیکٹورل وونٹ ہلک۔

ڈونلڈ ٹرمپ تینا گچین کاری مہم نا وخت تینے بدلی نا حامی و ”سٹیٹس ءِ “ شدید مخالف نا وڑاٹ پیش کرے۔ اوامیگریشن نا نظام اٹی اصلاحات اتنگ’ حکومت نا سمت ءِ درست کننگ و کیہی واپاری معاہدہ غاتے چٹفنگ نا نعرہ خلک۔ فتح آن گڈ تینا مخ تف آتیان تران اٹی اوتینا حریف ہیلری کلنٹن ءِ خراج تحسین پیش کرے۔ اوتینا خاہوت نا بندغ و سنگت آتا ہم ستاءِ کرے۔

اوپارے کہ خلقت آک اودے گچین آخبت کن وونٹ تسر۔ اوڑتون گچین معاشی ڈٹ اسے، مخالف آتے تین تون درسا کانہ و اختلافات آتے چٹفسا ملک ءِ متحد کینہ۔ ڈونلڈ ٹرمپ مچ آ دنیا ٹی آفس ٹاور، ہوٹل، کیسینوز، گالف کورسز و ایلو پنی تنصیب آتا مالک ءِ۔ اونا واپاری سرجزآتا چاروکی ءِ ٹرمپ آرگنائزیشن کیک۔ ہرانا او تینٹ صدر ءِ۔ او ریئل اسٹیٹ نا کاروبار تون منسلک مسنے۔

او 1965ء ٹی وارٹن اسکول آف فنانس آن گریجوایشن کرے۔ اونا پہچان 20 کروڑ ڈالر مالیت نا 58 مزلہ ٹرمپ ٹاور ءِ ہرا نیویارک نا پنی علاقہ مین ہیٹن نا نیام اٹ واقع ءِ۔ اونا ساڑی آ زائیفہ سلووینیا آن تعلق تخوک آ ماڈل میلانیا اونا مسٹ میکو زائیفہ ءِ۔ او داکان مست اِرا زائیفہ ءِ طلاق تسنے ، تینا سیاسی کیریئر نا بناءِ او 1980ء نا دہائی ٹی کرے او ریفارم پارٹی و ڈیموکریٹک پارٹی نا باسک مس و آخیر اٹی ریپبلکن پارٹی ٹی اوارمس۔

اوتینا متنازع بیان آتا سوب شہرت کٹا ہرافتے ٹی میکسیکو نا پردیسی تیا منشیات نا سمگلنگ نا دوبہ و مسلمان تا امریکہ ٹی داخلہ ءِ بند کننگ خاص وڑاٹ قابل ذکر ءُ۔ ساڑی آ امریکی صدارتی گچین کاری نا خاص ہیت دادے کہ ریپبلکن پارٹی نا فاتح اومیت دار ڈونلڈ ٹرمپ مسکوہی ٹی ڈیموکریٹک پارٹی وخت اس کہ ڈیموکریٹ صدارتی اومیت دار ہیلری کلنٹن مسکوہی ٹی ریپبلکن پارٹی نا باسک مسنے۔ ہیلری کلنٹن تینا شکست ءِ امنا کرینے و ڈونلڈ ٹرمپ ءِ فون کرسا اودے اونا سرسہبی آ مبارکبادی تسنے۔