کابل(پاکستان نیوز پوائنٹ 9نومبر2016ء) اوغانستان نا سویلی صوبہ ہلمند اٹی عسکریت پسند آتا برخلاف آپریشن نا وخت آ 9کمانڈر آتون اوار 90طالبان جنگوڑو خلنگانو۔ قندوز اٹی زوت اسے اٹ فوجی آپریشن نا بناء کننگ نا پڑو کننگانے، پکتیا ٹی اسہ دھماکہ اسے ٹی 5پولیس کارندہ تپاخت کریر،زابل اٹی اسہ جھیڑہ اسے ٹی مسہ عسکریت پسند تپاخت کریر۔ اوغان میڈیا نا رداٹ کمامدارآک پاریر کہ سویلی صوبہ ہلمند اٹی تدوک آ اسہ ہفتہ آن عسکریت پسند آتا برخلاف آپریشن جاری ءِ و داوخت آ 9کمانڈر آتون اوار 90طالبان جنگوڑو خلنگانو۔
کمامدارآتارداٹ کارروائی تیٹی طالبان نا کیہی ٹھکانہ غاتے نشانہ جوڑ کننگا۔ اوغان فورسز آک قطبی صوبہ قندوز اٹی آپریشن شفق ٹو بناء کننگ نا پڑو ءِ کرینو۔ قندوز پولیس نا کمانڈر تینا اسہ بیان اسے ٹی پارے کہ صوبہ ٹی زوت اسے اٹ فوجی آپریشن نا بناء کننگ انگ ءِ۔ قندوز آ ساڑی آ توتیٹی کیہی جلہو مسنے و اِرا وار صوبائی دارالحکومت نا گیشتر علاقہ غاتیا طالبانک تینا بیرک ءِ چست کرینو۔
دے ٹکی صوبہ پکتیا ٹی اسہ دھماکہ اسے ٹی 5پولیس کارندہ تپاخت کریر۔ کمامدارآک پاریر کہ گردیز نا ایب و کیب اٹی پولیس ناگاڈی نا خڑک بارودی سرنگ نا زوردار دھماکہ اس مس ہرانا نتیجہ ٹی 5پولیس کارندہ تپاخت کریر۔ داوخت اسکان ہچ ءُ تنظیم یا رڑاس داجلہو نا زمواری ءِ امنا کتنے۔ سویلی صوبہ زابل اٹی اسہ جھیڑہ اسے ٹی مسہ عسکریت پسند تپاخت کریر۔ کمامدارآتارداٹ جھیڑہ میزانئی ضلع ٹی مس۔ قطبی صوبہ سرائے پل اٹی طالبانک مغوی پولیس کارندہ ءِ سرقلم کریر۔
