کابل(پاکستان نیوز پوائنٹ 8نومبر2016ء) اوغانستان نا سیکورٹی فورس آک کیہی کارروائی تیٹی درزن آ عسکریت پسند آتا کسفنگ نا داوا کرینو، ہلمند اٹی فضائی جلہونا وخت آ طالبان نا 7سینئر کمانڈر تپاخت کریر، ننگرہار اٹی کیہی کارروائی تیٹی 16آن زیات عسکریت پسند تپاخت کریر، ارزگان اٹی عسکریت پسند آتا برخلاف کارروائی ٹی 25عسکریت پسند آتا کسفنگ نا داوا کننگانے۔
اوغان میڈیا نا رداٹ وزارت دفاع نا کنڈآن کابل اٹی جاری مروک آ اسہ بیان اٹی پاننگانے کہ تدوک آ دے سویلی صوبہ ہلمند اٹی اسہ فضائی جلہو اسے نا وخت آ طالبان نا 7سینئر کمانڈر تپاخت کریر۔ دا کارروائی ہلمند نا ضلع گرام سیر اٹی کننگا، بیان نا رداٹ جلہو اٹی طالبان نا سینئر کمانڈر ملا مجاہد، ملاآغامحمد، مولوی مصطفی و مولوی ہدایت تون اوار طالبان نا 7سینئر کمانڈر تپاخت کریر۔
صوب پروان اٹی سیکورٹی فورس آک طالبان رڑانا 11جنگوڑوآتے دزگیر کریر۔ ننگرہار اٹی کیہی کارروائی تیٹی 16آن زیات عسکریت پسند تپاخت کریر ہرافتے ٹی داعش نا مسہ جنگوڑو ہم اوار ءُ۔ کمامدارآتارداٹ ضلع خوگیانی ٹی اسہ کارروائی اسے ٹی 12عسکریت پسند تپاخت کریر۔ کارروائی نا وخت ہیرون تیار کروک چار لیبارٹری تے بھس کننگا۔ سویلی صوبہ ارزگان اٹی عسکریت پسند آتا برخلاف کارروائی ٹی 25عسکریت پسند آتے کسفنگ نا داوا کننگانے۔
کمامدارآتارداٹ دا کارروائیک ترین کوٹ و خڑک انا علاقہ غاتیٹی داسہ ہم جاری ءُ۔ قطبی صوبہ قندوز اٹی بارودی سرنگ نا دھماکہ ٹی طالبان نا سینئر کمانڈر تپاخت کرے۔ دارالحکومت کابل نا بنجائی علاقہ ٹی واقع مسیت اسے ٹی دھماکہ نا نتیجہ ٹی اسہ بندغ اس تپاخت و کیہیک ٹھپی مسر۔
