عراقی شار موصل و نینویٰ ٹی فضائی جلہوآتیٹی داعش نا 100 آن زیات جنگوڑو تپاخت کریر

عراقی شار موصل و نینویٰ ٹی فضائی جلہوآتیٹی داعش نا 100 آن زیات جنگوڑو تپاخت کریر

بغداد(پاکستان نیوز پوائنٹ 3 نومبر2016ء) عراق نا قطبی شار موصل و نینویٰ نا علاقہ ٹی عراقی فوج و اتحادی ملک آتا جنگی جہاز آتا فضائی جلہو آتیٹی شدت پسند رڑ داعش ءِ غیر معمولی جانی نسخان رسیفنگ نا داواکننگانے۔ عراقی فوج اسہ بیان اسے ٹی پارینے کہ تدوک آ دے صوبہ نینویٰ ٹی داعش نا کیہی ٹھکانہ غاتیا فضائی جلہو کننگا ہراٹی 100آن زیات داعشی جنگوڑو ءِ تپاخت کننگانے۔

ٹیلی ویژن الحدیث نیوز عراقی فوج انا اسہ ذریعہ اسے نا بابت پارینے کہ عراقی فوج و اتحادیک پنچ ہند آتیا داعش نا ٹھکانہ غاتیا بمباری کریر۔ اوبروی نینویٰ ہوٹل آ بمباری نا نتیجہ ٹی 68جنگوڑو تپاخت کریر وخت اس کہ الغابات نا ہند آ ارٹ میکو فضائی جلہو اٹی 29جنگوڑو تپاخت و 25ٹھپی مسنو۔ اسہ فضائی جلہو اس داعش نا ’دیوان الجند‘ ہیڈ کوارٹر آ کننگا ہرانا نتیجہ ٹی 10جنگوڑو تپاخت و 15ٹھپی مسنو۔ نینویٰ ٹی داعش نا اسہ سلہہ ڈپو اسے آ جلہو اٹی 10جنگوڑو تپاخت و بھلو کچ اسے ٹی گولہ بارود ہم بھس کننگانے۔