کابل(پاکستان نیوز پوائنٹ 08ستمبر 2016ء) اوغانستان اٹی بیداد نا واقعہ غاتیٹی 12فوجی کارندہ تپاخت کریر، ننگرہار اٹی سیکورٹی ادارہ غاک 15طالبان ءِ تپاخت کننگ نا داوا کرینو، فاریاب اٹی اسہ جھیڑہ اسے ٹی 5پولیس کارندہ و 4طالبان تپاخت کریر، لغمان اٹی اسہ دھماکہ اسے ٹی اِراشاری و اسہ پولیس کارندہ اس تپاخت کرے۔ اوغانستان اٹی اگست نا تواٹی مچ آ ملک اٹی بیداد نا واقعہ غاتیٹی 2800 نا خڑک بندغ تپاخت کریر۔
اوغان میڈیا نا رداٹ کابل اٹی وزارت دفاع نا کنڈآن برجاء مروک آ اسہ بیان اسے ٹی پاننگانے کہ تدوک آ 24گھنٹہ نا وخت آ ملک انا کیہی بشخ آتیٹی فوجی کارروائی و شدت پسندی نا واقعہ غاتیٹی 12فوجی کارندہ تپاخت کریر۔ بیان اٹی پاننگانے کہ دا کارروائیک، ننگرہار، کنڑ، غزنی، پکتیکا، پکتیا، میدان وردگ ، قندہار ، کابل ، غور ، بغلان ، قندوز و ارزگان اٹی کننگار۔
بیان اٹی پاننگانے کہ داوخت آ کیہی طالبان تپاخت و ٹھپی مسر۔ دے ٹکی صوبہ ننگرہار نا ضلع حصارک اٹی اوغان سیکورٹی ادارہ غاک 15طالبان تے تپاخت کننگ نا داوا کرینو۔ ہندی کمامدارآتا رداٹ کہوک آتیٹی اسہ پنی ءُ کمانڈر اس ہم اوارے۔ قطبی صوبہ فاریاب اٹی اسہ جھیڑہ اسے ٹی 5پولیس کارندہ و 4طالبان تپاخت کریر۔ کمامدارآتارداٹ دا جھیڑہ میمانہ نا علاقہ ٹی مس، لغمان اٹی اسہ دھماکہ اسے ٹی اِرا شاری و اسہ پولیس کارندہ اس تپاخت کرے۔
ہندی عہدیدار آک پاریر کہ دھماکہ شکرمن نا علاقہ ٹی اسہ دوکان اسے ٹی مس۔ دارالحکومت کابل اٹی پنچ شنبے آزوردار دھماکہ اسے نا توار بس واہم دمدستی وڑاٹ جانی نسخان نا بارواٹی معلوم مننگ کتو۔ کمامدارآتارداٹ دھماکہ فورتھ ڈسٹرکٹ نا علاقہ تیمانہ ٹی مس۔ داکان بیدس اوغان کمامدارآک پارینو کہ تدوک آ تو مچ آ ملک اٹی بیداد نا واقعہ غاتیٹی 2800 نا خڑک بندغ تپاخت کریر ہرافتے ٹی شاری تا اسہ بھلو کچ اس ہم اوارارے۔ حکومت نا کنڈآن برجاء حساب وکتاب اٹ پاننگانے کہ 1600 کارروائی تیٹی داتپاخت آک ریکارڈ کننگانو ہرافتے ٹی 1200 بندغ ٹھپی مسنو۔
