واشنگٹن(پاکستان نیوزپوائنٹ16نومبر2017ء) امریکی سینیٹ نا آرمڈ سروسز کمیٹی نا باسک سینیٹر ریڈ پارینے کہ اوغانستان اٹی امن کن امریکہ و پاکستان اٹی ہیت وگپ انا عمل نا برجاسلنگ بھاز المی ءِ۔ اوداہیت ءِ پنچ شنبے نادے داڑے امریکہ ٹی پاکستان نا سفیر اعزاز چوہدری تون اوڑدہی ٹی پارینے ہرا اوغانستان نا تازہ انگا حالیت و سویلی ایشیاکن پوسکن آ حکمت عملی نا بارواٹی پاکستان نا موقف آن امریکی سینیٹ ءِ معلومدار کننگ کن اوڑدہی کننگ ءِ۔
سینیٹر ریڈ سینیٹ نا فنڈ انا کاریم اٹ اتنگ، بینکنگ، ہاؤسنگ و اربن افیئرز نا کمیٹی نا باسک ہم ارے۔ پاکستانی سفیر اعزاز چوہدری امریکی سینیٹر ریڈ ءِ پارے کہ پاکستان قبائلی و سیمی علاقہ غاتیان غٹ عسکریت رڑ تا صفایا ءِ کرینے و دہشت گردی نا لہر انا جوان وڑاٹ مون ءِ تورینے ۔ و سیکورٹی حالیت آتیٹی گچینی اتنگ آن ملک انا معیشت اٹی ترندی اتنگ نا کوشست آتیٹی بھاز کمک ملنگ ءِ۔
اوپارے کہ مچ آ دنیا ٹی پاکستان نامعیشت شون ہلوک آمعیشت نا اعتراف ءِ کننگ انگ ءِ و ملک انا سیکورٹی حالیت آتیٹی گچینی بننگ آن امریکہ نا کاروباری بشخ اتون اوار زرکارآک پاکستان اٹی زرکاری کننگ اٹ است خواہی ہلنگ ءُ۔ پاکستانی سفیر اعزاز چوہدری زورشاغسا پارے کہ پاکستان اوغانستان اٹی امن کن امریکہ تون اواری اٹ کاریم کننگ نا خواہندار ءِ انتئے کہ اوغانستان اٹی نزوری نا برجاسلنگ نا حالت اٹ پاکستان نامعیشت و سیکورٹی سرسہبی تے خلیس مون تروکی مننگ کیک۔
اواوغانستان نا تہٹی دا غیر حکومتی علاقہ غاتیٹی ودکی آ گڑتی نا درشانی ءِ کرے ہرافتے دہشت گرد عنصر آک پاکستان آ جلہو آتے کن کاریم اٹ اتنگ ءُ۔ امریکی سینیٹر رڈ سفیر اعزاز چوہدری نا تروک آ بریفنگ نا ستاءِ کرے و پارے کہ پاکستان و امریکہ نا نیام اٹ پدریسہ مذاکراتی عمل اوغانستان اٹی امن کن بھاز المی و اہم ءِ۔
