طرابلس(پاکستان نیوز پوائنٹ 29اگست 2016ء) لیبیا ٹی عسکریت پسند داعش نا زیر کنٹرول شار سرت اٹی تازہ جنگ انا نتیجہ ٹی حکومت نا 28 کارندہ تپاخت و کم از کم 180 ٹھپی مسنو۔ درملکی خبر رساں ادارہ غاتا رداٹ سرت تازہ جنگ اٹی تپاخت کروک آتا کچ 28 مسنے وخت اس کہ ٹھپی مروک آ بندغ آتا درمان جاری ءِ۔ لیبیا نا سیکورٹی ذرائع نا پاننگ ءِ کرکی شار سرت اٹی تازہ تپاخت آک ہمووخت آ مسر ہراتم حکومتی فوج داعش نا گڑھ نا کنڈا گام کننگ نا بناءِ کرے۔
خیال سلے کہ لیبیائی فوج انا سرت اٹی داعش نا برخلاف جنگ تدینگوک آ 3 تو آن جاری ءِ۔ حکومتی فوج ءِ نجی ملیشیا، اقوام متحدہ نا امن فوج و امریکہ نا سروکی ٹی اتحادی تا کمکاری ہم دوئی ءِ ہرا اگست نا ویل آن سرت اٹی داعش ءِ لتاڑنگ کن فضائی جلہو کننگ ءُ۔ لیبیائی فوج انا ترجمان نا رداٹ مخلوط بنجائی حکومت نا بست و بند اٹی سیکورٹی فورسز آک سرت ءِ داعشی عسکریت پسند آتیان کشنگ کن جاری آپریشن نا آخری مرحلہ نا بناءِ یک شنبے آ کننگا ولے داعش نا کنڈآن ورندی کارروائی ٹی اودے غیر معمولی جانی نسخان ہرفوئی تما۔
فوجی ترجمان رضاعیسیٰ میڈیا ءِ پارے کہ ننا فورسز آک سرت اٹی داعش نا آخری 2بنجاٹی پترینگ انگ نا کوشست کریر واہم اوفتے ہڑتوم آ بنجا قطب اٹی کالونی نمبر 1 و دے ٹک اٹی کالونی نمبر 3 آ سخت ورندی جلہو نا مون تروئی تما اونا باوجود آپریشن جاری ءِ۔
