نیویارک(پاکستان نیوز پوائنٹ 29اگست 2016ء) امریکہ ٹی پاکستان نا بڑزکو کہول انا سفارتکار جلیل عباس جیلانی و ڈاکٹر ملیحہ لودھی پاکستان نا کنڈآن کشمیری الس نا حق خودارادیت نا پورو مخ تفی نا عزم انا اعادہ ءِ کرینو۔ اقوام متحدہ ٹی پاکستان ناآخبتی مندوب ڈاکٹر ملیحہ لودھی و امریکہ ٹی پاکستان نا سفیر جلیل عباس جیلانی داہیت پاکستان نا اڈتننگ نا 70 سال پورو مننگ نا مناسبت آن نیویارک اٹی اسہ پروقار دود و سالانہ پریڈ آن تران کرسا پارے۔
دادود اٹی امریکہ ٹی رہینگوک سد آ پاکستانی شاریک خاہوت آتون اوار شرکت کریر۔ پاکستانی سفارتی عہدیدار آک دود انا شریک مروک آتے مقبوضہ کشمیر اٹی بھارتی فوج انا ظلم و بربریت نا بارواٹی سرجمی اٹ آگاہ کرے و پارے کہ بھارتی سیکورٹی فورسز آک انسانی حق انا بدترین پامالی تا ارتکاب ءِ کرسا کشمیری تا پرامن جہد ءِ واک انا وحشیانہ کاریم اٹ اتنگ نا کمک اٹ توننگ نا گام گیج کننگ ءُ ہرانا بین الاقوامی برادری ءِ پبی نوٹس ہلوئی مرے۔
داوخت آ شریک مروک آک بھارت نا برخلاف و کشمیری تا حق اٹی نعرہ خلکر و کشمیر جوڑ مریک پاکستان نا نعرہ ءِ خلکر۔ ڈاکٹر ملیحہ لودھی تینا تران اٹی کشمیری تا تاریخی جہد ءِ پبی خراج عقیدت پیش کریر و پاریر کہ پاکستان اقوام متحدہ و ایلو جہانی فورم آتیا کشمیر نا ویل ءِ تالان کننگ کن تینا پبی کڑد ءِ ادا کننگ ءُ۔ اودود انا شریک مروک آتے پارے کہ اقوام متحدہ نا جنرل اسمبلی نا سالانہ دیوان نا وخت آ وزیراعظم محمد نواز شریف تینا تران اٹی کشمیر نا ویل ءِ تالان کیک۔
وزیراعظم دنیا نا 100 آن زیات ملک آتا سروک مملکت و وزیراعظم آتا مون آ مسکوہی کیہی عشرہ غاتیان جاری تنازعہ ءِ چست کیک تانکہ ڈیہہ ٹی امن نا اڈتننگ ءِ ممکن جوڑ کننگ مرے۔ اوپارے کہ اقوام متحدہ نا پلیٹ فارم آ پاکستان ءِ عزت و شرف نا نگاہ ٹی ہُننگک انتئے کہ مچ آدنیا ٹی امن نا اڈتننگ کن پاکستان نا کوشست آک کس اسے آن ڈکوک افس۔ اقوام متحدہ نا امن مشن اٹی پاکستان فوج انا اوار مننگ نا بابت سرفہرست ملک آتیٹی ءِ۔
امریکہ ٹی پاکستان نا سفیر جلیل عباسی جیلانی ہرا پریڈ نا گرینڈ مارشل ئس ، پاکستانی کمیونٹی ءِ پبی خراج تحسین پیش کرے و پارے کہ پاکستانی نژاد امریکی شاری نہ صرف پاکستان بلکن امریکہ ٹی ہم سخت خواری و جہد آن ملک انا پن ءِ روشن کننگ ءُ۔ نیویارک اٹی پاکستانی جنرل قونصر راجہ علی اعجاز داوخت آ تینا گونڈ انگا تران اٹی پاکستانی کمیوٹی نا تین پہ تینی اتفاق و اتحاد آ زورشاغا و پارے کہ ملک انا شون و شونہالی کن ننے عزم کروئی مریک۔
دود انا شریک مروک آک میڈیسن ایونیو آن 23سٹریٹ اسکان مارچ کریر۔ مارچ انا کل کسر ءِ پاکستان و امریکہ نا بیرک آ بیرفنگاسس۔ داوخت آ 12فلوٹس ہم تیار کننگاسس ہرافتے ٹی پاکستان نا دود وربیدہ و کیہی بشخ آتیٹی پیش رفت ءِ تالان کننگا۔ دود انا ایسری آ فریحہ پرویز تینا فن انا شون و شان مظاہرہ ءِ کرسا شریک مروک آتے محظوظ کرے۔ داپریڈ نا بست و بند ءِ پاکستان ڈے پریڈ کمیٹی کریسس۔
