جنیوا(پاکستان نیوزپوائنٹ13اکتوبر2017ء) پاکستان سویلی ایشیاٹی امن و استحکام نا مون آ دننگ نا عزم اتون اوار اوار ڈیہہ ٹی جوہری آزموندہ غاتیا پابندی کن ہڑتوم آ کنڈآتا معاہدہ غاتا سلاہ نا ہم اعادہ ءِ کرینے۔ جنیوا ٹی اقوا متحدہ کن پاکستان نا آخبتی مندوب فرخ عامل جنرل اسمبلی نا سلہہ غاتا کٹفنگ و سلامتی نا بارواٹی کمیٹی نا دیوان ءِ پارے کہ گڑاس ملک آتا کنڈآن فوجی بالادستی نا چٹفپروک آ خواہش علاقائی و جہانی سلامتی کن خلیس اسے نا سوب ءِ وخت اس کہ پاکستان نا سلامتی پالیسی سگ، زمواری و سلہہ غاتا دوڑ آن پاناد کون آ اصول آتیا سلوک ءِ، مثبت ردعمل ملیپننگ نا باوجود پاکستان تدوک آ سال جنرل اسمبلی نا دیوا ن ءِ پارے کہ او سویلی ایشیاٹی جوہری آزموندہ غاتیا پابندی نا معاہدہ غا کاریم کننگ کن تیار ءِ و پاکستان دا سلاہ غا داسہ ہم سلوک ءِ۔
ننا داسلاہ نا بنداو ڈیہہ نا ایلو ملک آتا کنڈآن ہمورویہ غاتیاٹی ءِ ہرانا مسخت دادے کہ ڈیہہ نا ملک آتا نیام اٹ فوجی توازن نا آپشن ہم ساڑی مرے۔ اوپارے کہ سلہہ غاتا کٹفنگ کن ایلو کوشست آک ہم برجاءُ ولے داکوشست آتے کروک آ ملک آتا دراصل تینا تینا ایجنڈااسے ہرافتا سوب دا کوشست آک تعطل نا گواچی ءُ۔ اوپارے کہ جوہری سلہہ غاتا کٹفنگ نا کوشست آک ہمووخت اسکان سرسہبی آن دوچار مننگ کپسہ ہراوخت اسکان داملک آتا گڑتی تے مر کننگپ ہرا تینا سلامتی کن تینا جوہری سلہہ غاتیا سیبو کیرہ۔
جوہری سلہہ غاتیٹی کٹفنگ و بڑزکو خلاء نا پرامن کاریم اٹ اتنگ نا غیر امتیازی و جہانی معاہدہ غاتے کن کانفرنس آن ڈس آرمامنٹ گچین ءُ فورم اسے۔ دُن انگا معاہدہ غاتا بنداو جہانی کہول آ قابل قبول مینڈیٹ اس بایدے مرے۔ دابابت پاکستان نا سلاہ جہانی فورم تیا مست آن ساڑی ءِ۔ پاکستانی مندوب پارے کہ ننے جوہری سلہہ غاتیا پابندی نا معاہدہ غاتیا عملدرآمد اٹی دہرے معیار نا زہم آتا ہم جاچ ءِ ہلوئی مریک۔ پاکستان جوہری مواد آتا گدریفنگ ءِ توننگ نا کوشست آتیٹی سرگرمی اٹ اوار مسنے و سلامتی کونسل نا قرارداد نمبر 1540 آ پورووڑاٹ عمل کننگ ءِ و جوہری معاہدہ غاتے گچین وسوگو جوڑ کننگ اٹی پبی است خواہی تخک۔
