واشنگٹن(پاکستان نیوزپوائنٹ13اکتوبر2017ء) بنجائی وزیر داخلہ احسن اقبال اسیجائی ہدف آتا دوئی کننگ تون اوار اوار ڈیہہ نا ویل آتا چٹفننگ کن پاکستان و امریکہ نا تین پہ تینی تعلقداری تا سوگوی آ زورشاغانے۔ واشنگٹن نا مڈل ایسٹ انسٹیٹیوٹ اٹی امریکی سکالرز و تھنک ٹینکس آن تران کرسا بنجائی وزیر داخلہ پارے کہ امریکہ نا انٹیلی جنس شیئرنگ نا بنداو آ 2012ء ٹی اوغانستان آن برمتہ مروک آ امریکی شاری کیٹلن کولمن و اونا خاہوت نابازیابی کن پاکستان نا سیکورٹی فورس آتا سرسہب کارروائی آن ہڑتوم آ ملک آتا خڑکی تعلقداری تاشاہدی اسے۔
احسن اقبال ساڑی مروک آتے پاکستان اٹی گچین مروک آ سیکورٹی حالیت آتیا بریفنگ ہم تس۔ او2013ء آن پد پاکستان اٹی دہشت گرد جلہو آتیٹی نمان کمتیءِ مون آ تخا ہراڑآن ملک اٹی درملکی زرکارآتا پت اٹی ودکی مسنے۔ بنجائی وزیر پارے کہ پاکستان نا دہشت گردی نا چٹفنگ نا پالیسی بیست ٹکی نیشنل ایکشن پلان آ تالان ءِ و ڈیہہ ٹی دہشت گردی نا چٹفنگ نا بابت داوڑنا کوشست آتا ہچ ءُ مثال اس ملیپک۔
ڈٹ بندی، شونداری و اصلاحات نا قلمدان ہم وزیرداخلہ احسن اقبال تون ءِ و اوپارے کہ اوناحکومت گدرینگوک آ چارسال اٹی بنداوی ڈھانچہ ناشونداری و اقتصادی اصلاحات نا پروگرام آن ملکی معیشت ءِ نمان شون تسنے۔ اوچین پاکستان اقتصادی راہداری ڈٹ(سی پیک) ءِ انقلابی ڈٹ اس گوندسا پارے کہ داڑآن سویلی و نیامی ایشیانا ڈیہہ نا شونداری، سوگوی و شونہالی ٹی نمان ودکی مریک۔