پاکستان و مالدیپ سارک سروک دیوان ءِ اسلام آباد اٹی دُوارہ بٹنگ انگا اتفاق کرینو سلاہکار خارجہ سرتاج عزیز نا ”اے پی پی“ تون ہیت وگپ

پاکستان و مالدیپ سارک سروک دیوان ءِ اسلام آباد اٹی دُوارہ بٹنگ انگا اتفاق کرینو سلاہکار خارجہ سرتاج عزیز نا ”اے پی پی“ تون ہیت وگپ

مالے(پاکستان نیوزپوائنٹ 27جولائی2017ء) پاکستان و مالدیپ سارک سروک دیوان ءِ اسلام آباد اٹی دُوارہ بٹنگ انگا اتفاق کرینو۔ داہیت ءِ سلاہکار خارجہ سرتاج عزیز پنچ شنبے نا دے وزیراعظم محمد نواز شریف نا مسہ دے ئی دورہ مالدیپ نا ایسری آ اے پی پی تون ہیت و گپ کرسا پارے۔ سرتاج عزیز پارے کہ مالدیپ نا صدر عبداللہ یامین عبدالقیوم سارک دیوان ءِ پاکستان اٹی دُوارہ اڈتننگ نا ہیت ءِ کرینے ہرا ملک اکن خوش آئند ءُ کلہو اسے۔

اوپارے کہ ہڑتوم آ ملک آتا راہشونک سارک انا آخبت نا بارواٹی ہیت وگپ کریر و سارک ءِ کاریمی ءُ تنظیم اس جوڑ کننگ نا غرض آن اواری اٹ کاریم کننگ آ اتفاق کریر۔ سرتاج عزیز پارے کہ گدرینگوک آسال بھارت سارک سروک دیوان نا اسلام آباد اٹی اڈتننگ نا مخالفت ءِ کریسس ولے مالدیپ اونا مخ تفی ءِ کتویسس و سارک سروک دیوان اسلام آباد اٹی اڈتننگ کن پورو کمک فراوان کریسس۔

سلاہکار خارجہ پارے کہ پاکستان و مالدیپ نا نیام اٹ بزنس ٹوبزنس رابطہ غاک ءُ و جوائنٹ بزنس کمیٹی و بزنس کونسل نا اڈتننگ آن ہڑتوم آ ملک آتا نیام اٹ واپاری و زرکاری نا سرجزآتیٹی ودکی مریک۔ سرتاج عزیز پارے کہ مالدیپ اٹی اسہ تہائی ڈاکٹر پاکستانی ءُ و وزیراعظم نواز شریف مالدیپ اٹی میڈیکل کالج نا اڈتننگ و جوڑ جاڑ کن پنچ ملین ڈالرنا منظوری ءِ تسنے۔

اوپارے کہ پاکستان مالدیپ نا طالب علم آتے کن کسبی ادارہ غاتیٹی نشست آتیٹی ہم ودکی کرینے۔ اوپارے کہ ہڑتوم آ ملک آتا نیام اٹ دفاعی بشخ اٹی کمکاری آ ہم ہیت مسنے وخت اس کہ پاکستان مالدیپ ءِ پائلٹون نا تربیت کن اِرا تربیتی جہاز فراوان کیک۔ سرتاج عزیز پارے کہ مالدیپ بھاز ترندی اٹ شونداری آ روان ءِ و دنیا نا 100 گچین ریزورٹ آتیان 10مالدیپ اٹی ءُ۔