واشنگٹن(پاکستان نیوزپوائنٹ 27جولائی2017ء) امریکہ ٹی پاکستان نا سفیر اعزاز چوہدری پارینے کہ ہندن ءُ شاہدی ساڑی ارے کہ پاکستان نا سیمی علاقہ غاتیٹی سیکورٹی فورس آتا آپریشن آن نروک آ عسکریت پسند آک اوغانستان اٹی حکومتی عملداری آن آجو علاقہ غاتیٹی رکھوک ٹھکانہ جوڑ کرینو ہراڑے او پاکستان و اوغانستان اٹی دہشت گردی نا مربوط کارروائی تا ڈٹ بندی ءِ کیرہ۔
او داہیت ءِ واشنگٹن اٹی انٹرنیشنل انسٹی ٹیوٹ فارسٹریٹجک سٹڈیز نا کنڈآن اڈ ہلوک آ دود آن تران کرس کرے داوخت آ خوان نا چاہندار، دانشورو زند انا چندی بشخ آتیان تعلق تخوک آ بندغ آک بھلو کچ اسے ٹی ساڑی ئسر۔ اوپارے کہ اوغانستان اٹی مروک آ دہشت گردی نا واقعہ غاتے کن پاکستان ءِ مورد دوبہ دار کننگ کمکار ثابت مفک۔ پاکستانی سفیر پارے کہ اوغان ویل انا فوجی ایسری ممکن اف و ضرورت داہیت انا ءِ کہ اوغانستان اٹی گیشتر سیاسی مفاہمت ءِ مون آ دننگے، پاکستان سمجھک کہ سیاسی مفاہمت ہی اوغانستان نا گیشتر و پائیدار امن نا اسٹ انگا کسر ءِ۔
پاکستانی سفیر پارے کہ اوغانستان اٹی امن و سوگوی کن سیاسی بشمول چندی اوغان دھڑتا نیام اٹ مفاہمت، جامع و فعال سیمی بست بند و انصرام ، اوغان باہوٹ آتا پدی ہِننگ و پاکستان و اوغانستان نا نیام اٹ خڑکی کمک سخت المی ءِ۔ اوساڑی مروک آتے دہشت گردی نا برخلاف جنگ اٹی پاکستان نا سرسہبی و قربانی، پاکستان نا اقتصادی شوندار ی و ڈیہہ نا اہم ویل آتابارواٹی پاکستان نا موقف نا بابت آن سرجمی اٹ معلومدار کرے۔
اوپارے کہ دہشت گردی و انتہاء پسندی نا چٹفنگ کن گام گیج آتون اوار اوار اقتصادی شونداری کن گام گیج کننگا ہرانا گچین ءُ زہم اس مون آ بننگ ءِ، پاکستان دہشت گردی نا برخلاف جنگ اٹی بیش بہا جانی و مالی قربانی تسنے، داجنگ اٹی ننا قربانیک غٹ آن زیات ءُ۔ اعزاز چوہدری پارے کہ حکومت اقتصادی بشخ انا شونداری ءِ اولیت تسنے و دارداٹ اصلاحات نا عمل جاری ءِ ہرانا سوب پاکستان نا اقتصادی ٹک آک مثبت رجحان نا عکاسی ءِ کننگ ءُ۔
اوپاک چین اقتصادی راہداری نا خصوصی وڑاٹ ذکر ءِ کرے وپارے کہ دا ٹی ڈیہہ ٹی شونداری و شونہالی نا پوسکن آ دور بناء کیک، داراہداری پاکستان اٹی امریکہ تون اوار جہانی زرکارآتے کن زرکاری نا وارخواہی فراوان کرینے و جہانی زرکارآک داڑے زرکاری کن تینا خواہش نا درشانی ءِ کننگ ءُ۔ اومستی پارے کہ پاکستان ڈیہہ ٹی امن و سوگوی نا مسخت آتے کن امریکہ تون اسہ شریدار اسے نا وڑاٹ کاریم کننگ کن تیار ءِ۔
