مالے(پاکستان نیوزپوائنٹ 25جولائی2017ء) وزیراعظم محمد نواز شریف سے شنبے نا دے مالدیپ نا مسہ دے ئی سرکاری دورہ غا مالے آ سرمس۔ مالدیپ نا دارالحکومت مالے نا بالی پٹ آ مالدیپ نا صدر عبداللہ یامین و کابینہ نا باسک آک وزیراعظم نا جم و جوش اٹ خیرمقدم ءِ کریر۔ وزیراعظم (اینو) 26جولائی آ مالدیپ نا 52می یوم آجوئی نا دود آتیٹی مہمان خاص نا حیثیت اٹ شرکت کن صدر عبداللہ یامین عبدالقیوم نا سلہ غا 25آن27جولائی اسکان جمہوریہ مالدیپ نا سرکاری دورہ ءِ کننگ ءِ، بیگم کلثوم نواز، وزیراعظم نا سلاہکار خارجہ امور سرتاج عزیز ، سینیٹر پرویز رشید و بڑزکو کمامدارآک ہم اوڑتون اوار ءُ۔
دورہ ٹی وزیراعظم محمد نواز شریف مالدیپ نا صدر تون باضابطہ مذاکرات ہم کیک وخت اس کہ داوخت آ چندی بشخ آتیٹی کمکاری کن کیہی مفاہمت نا یات داشت و معاہدہ غاتیا دستخط ہم کننگک۔ داڑے داہیت قابل ذکر ءِ کہ پاکستان مالدیپ تون تینا تعلقداری تے بھاز اہمیت ایتک ہرا تین پہ تینی شرف و اسیجائی مفاد آتیا مبنی ءُ۔ مالدیپ تون سفارتی تعلقداریک26جولائی 1966ء آ استوار مسوسر ہرا وخت انا تدینگ انگ تون اوار اوار سوگو مننگ ءُ۔
ہڑتوم آ ملک آک تین پہ تینی اہمیت نا معاملہ غاتیا علاقائی و جہانی فورم تیا اسہ ایلو تون خڑکی کمک کیرہ۔ پاک مالدیپ تعلقداریک ہڑتوم آ ملک آتا الس نا نیام اٹ خڑکی و پرجوش تعلقداری تیان عبارت ءُ۔ وزیراعظم نا دورہ آن سیاسی ، واپاری، اقتصادی، دفاعی، سیل و سواتی ، تعلیمی و السی کہول آ رابطہ غاتون اوار غٹ بشخ آتیٹی ہڑتوم آ کنڈآتا تعلقداری تے پین سوگوی رسینگک۔ دادورہ ڈیہہ نا ملک آتون فعال تعلقداری تا تینا پالیسی تیان اہم آہنگ ءِ۔
