واشنگٹن(پاکستان نیوز پوائنٹ 17اگست 2016ء) امریکہ اسہ وار ولدا پاکستان و بھارت آ زورشاغانے کہ او ہڑتوم آ دہشت گردی نا برخلاف گام گیج آتیٹی اسہ ایلو تون کمکاری ءِ ودکی کیر انتئے کہ دا نہ صرف ہڑتوم آ ہمسایہ ملک بلکن مچ آ ڈیہہ و امریکہ کن جوان ءِ۔ امریکی محکمہ خارجہ نا ترجمان مارک ٹونر صحافی تے بریفنگ نا وخت آ پارے کہ امریکہ دہشت گردی نا مون ءِ توننگ کن پاکستان و بھارت نا نیام اٹ زیات کمک و ہڑتوم آ ملک آتا نیام اٹ جامع مذاکرات نا است بڈی ءِ کیک۔
پاکستان نا کنڈآن بھارت ءِ ہیت وگپ نا پیش کش نا بابت آن ہریفوک آ اسہ سوج اسے نا ورندی ٹی امریکی ترجمان پارے کہ ہڑتوم آ ملک آتا نیام اٹ زیات کمکاری و ہیت و گپ اہم ءِ و امریکہ دابابت آن گام و کوشست آتا است بڈی ءِ کیک۔ پاکستان بھارت ءِ تدوک آ ہفتہ ہی جوہری آزموندہ غاتیا پابندی نا معاہدہ نا سلاہ پیش کرینے۔ پاکستان 1998 ء ٹی جوہری بمب دھماکہ غاتیان گڈ ہم بھارت ءِ جوہری آزموندہ غاتیا پابندی نا معاہدہ سی ٹی بی ٹی نا ہڑتوم آ ملک آتا کنڈآن توثیق نا سلاہ تسوسس ولے بھارت نا کنڈآن دامعاملہ غا مثبت ردعمل ظاہر کننگ تو۔
