کابل(پاکستان نیوز پوائنٹ 17اگست 2016ء) اوغانستان نا دے ٹکی صوبہ لغمان اٹی اِرا جھیڑہ غاتیٹی مسہ اوغان فوجی کارندہ و مسہ عسکریت پسند تپاخت کریر، قطبی اوغانستان اٹی شدت پسند تنظیم داعش نا شیڈو گورنر نا دزگیری نا داوا کننگانے۔ ہلمند اٹی طالبان چار شاری ءِ برمتہ کننگ آن گڈ اوفتا خون ءِ کریر۔ اوغان میڈیا نا رداٹ دے ٹکی صوبہ لغمان نا گورنر نا ترجمان میڈیا ءِ پارے کہ تدوک آ دے مہتر لام نا خڑک اِر اجھیڑہ ٹی مسہ اوغان فوجی کارندہ و مسہ عسکریت پسند تپاخت کریر۔
اوپارے کہ جھیڑہ غاک طالبان تا کنڈآن چیک پوسٹ آ جلہو آن پد مسر ۔ قطبی اوغانستان اٹی شدت پسند تنظیم داعش نا شیڈو گورنر نا دزگیری نا داوا کننگانے۔ اوغان کمامدارآک پاریر کہ صوبہ جوزجان کن داعش نا شیڈو گورنر بازمحمد ءِ ہمووخت آ دزگیر کننگا ہراتم او تینا تنظیم نا سرجز آتے تالان کننگ نا کوشست کریکہ۔ کمامدارآتارداٹ او تنظیم کن ورناتے بھرتی کریکہ۔
یات سلے کہ قطبی اوغانستان اٹی داعش نا کنڈآن تنظیمی سرجزآتے تالان کننگ نا دا اولیکو واقعہ اف داکان مست صوبہ بلخ اٹی ہم داعش کیہی کارروائی کرینے۔ صوبہ ہلمند اٹی طالبانک چار شاری ءِ برمتہ کننگ آن گڈ اوفتا خون ءِ کریر۔ ہندی کمامدار آتارداٹ واقعہ نا برخلاف شاریک شدید برانزی مچی کریر۔ مچی کروک آک اِرا ورنانا لاش تے روڈآتخسا برانز کریر۔ ہلمند اٹی ساڑی آ دے تیٹی طالبان نا کنڈآن شاری تیا جلہو آتیٹی ودکی مسنے۔
