کابل(پاکستان نیوزپوائنٹ 16اگست 2016ء) دے ٹکی اوغانستان اٹی نیٹو نا فضائی کارروائی ٹی 12عسکریت پسند تپاخت کریر، نورستان اٹی سیکورٹی فورسزآک اسہ کارروائی اسے ٹی اِرا نیاڑی خود کش جلہو گیر آتون اوار 29 عسکریت پسند آتے تپاخت کننگ نا داوا کرینو۔ صوبہ جوزجان اٹی نیاڑی خودکش جلہو گیر تینے پولیس نا حوالہ کرینے۔ اوغان میڈیا نا رداٹ ہندی کمامدارآک پاریر کہ نیٹو فضائیہ پکتیا و پکتیکا ٹی طالبان تا ٹھکانہ غاتیا بمباری کریر۔
جنگی جہاز آک پکتیکا نا اِرا ضلع و پکتیا نا ضلع خوش مند اٹی طالبان تا ٹھکانہ غاتے نشانہ جوڑ کریر۔ کمامدارآتارداٹ ہڑتوم آ کارروائی تیٹی 12طالبان تپاخت و چندیک ٹھپی مسر۔ دے ٹکی صوبہ نورستان اٹی سیکورٹی فورسز آک اسہ کارروائی اسے ٹی اِرا نیاڑی خودکش جلہو گیر آتون اوار 29 عسکریت پسند آتے تپاخت کننگ نا داوا کرینو۔ اوغان وزارت دفاع نا رداٹ داکارروائی بے چیٹ ضلع ونت و یگال اٹی کننگا ہراڑے طالبان تا کارروائی تیٹی ساڑی آ ہفتہ غاتا وخت آ نمان ترندی بسنے۔
وزارت دفاع نا بیان اٹی پاننگانے کہ داوخت آ 31عسکریت پسند ٹھپی مسر۔ قطبی صوبہ جوزجان اٹی اسہ نیاڑی خودکش جلہو گیر اس تینے پولیس نا حوالہ کرینے۔ پولیس نا رداٹ ہندا نیاڑی تینا اَرغ نا پاننگ آ خودکش جلہو کن آمادگی ظاہر کریسس۔
