سعودی عرب نا کابینہ نا کوئٹہ ٹی دہشت گردی نا ساڑی آ واقعہ نا مذمت

ریاض۔(پاکستان نیوزپوائنٹ 16اگست 2016ء) سعودی عرب نا کابینہ کوئٹہ ٹی دہشت گردی نا ساڑی آ واقعہ نا ترندی اٹ مذمت ءِ کرینے۔ سعودی اخبار نا رپورٹ نا رداٹ کابینہ نا دیوان تدوک آ دے سعودی عرب نا فرمان روا و خادم الحرمین الشریفین شاہ سلمان بن عبدالعزیز نا کماشی ٹی مس۔ دیوان آن گڈ جاری مروک آ بیان اٹی پاننگانے کہ سعودی عرب نا کابینہ پاکستان نا شار کوئٹہ نا ہسپتال اٹی بمب دھماکہ نا ترندی اٹ مذمت ءِ کیرہ ہراٹی کیہی بے گناہ شاریک تپاخت کریر۔ کابینہ تھائی لینڈ و شام اٹی دہشت گردی نا واقعہ غاتا ہم مذمت ءِ کرینے۔