کابل اٹی بمب دھماکہ ٹی مسہ بندغ ٹھپی، بغلان اٹی طالبانک اسہ اہم ءُ ضلع اسے آ کوزہ کریر،

سویلی صوبہ ہلمند ٹی طالبان و فوج انا نیام اٹ جھیڑہ غاتا چرجوئی برجاء، صوبائی پولیس چیف بمب دھماکہ ٹی زرس بچا، ہرات اٹی دھماکہ خیز مواد آتا ترخنگ آن 7عسکریت پسند تپاخت

کابل اٹی بمب دھماکہ ٹی مسہ بندغ ٹھپی، بغلان اٹی طالبانک اسہ اہم ءُ ضلع اسے آ کوزہ کریر،
سویلی صوبہ ہلمند ٹی طالبان و فوج انا نیام اٹ جھیڑہ غاتا چرجوئی برجاء، صوبائی پولیس چیف بمب دھماکہ ٹی زرس بچا، ہرات اٹی دھماکہ خیز مواد آتا ترخنگ آن 7عسکریت پسند تپاخت

کابل (پاکستان نیوزپوائنٹ 15 اگست2016ء) اوغان دارالحکومت کابل اٹی بمب دھماکہ ٹی مسہ بندغ ٹھپی مسر، قطبی اوغانستان نا صوبہ بغلان اٹی طالبانک اسہ اہم ءُ ضلع اسے آ کوزہ کریر۔ سویلی صوبہ ہلمند اٹی طالبان و فوج انا نیام اٹ جھیڑہ غاتا چرجوئی برجاءِ وخت اس کہ صوبائی پولیس چیف اسہ بمب دھماکہ اسے ٹی زرس بچا۔ ہرات اٹی دھماکہ خیز مواد آتا ترخنگ آن 7 عسکریت پسند تپاخت کریر۔

اوغان میڈیا نا رداٹ وزارت داخلہ نا کنڈآن جاری مروک آ اسہ بیان اسے ٹی پاننگانے کہ تدوک آ دے کابل نا علاقہ مکروریان اٹی اوغان نیشنل آرمی نا گاڈی ٹی زورداردھماکہ اس مس ہرانا نتیجہ ٹی مسہ بندغ ٹھپی مسر۔ بیان اٹی پاننگانے کہ بمب مقناطیس نا کمک اٹ گاڈی ٹی تخنگاسس و ٹھپی مروک آ بندغ آک لس شاری ئسر۔ قطبی اوغانستان نا صوبہ بغلان اٹی طالبانک اسہ اہم ءُ ضلع اسے آ کوزہ کریر۔

صوبائی کونسل نا اسہ باسک اس پن ءِ پاش کپننگ نا شرط آمیڈیا ءِ پارے کہ طالبانک ضلع دانائی غوری آ کوزہ کرینو۔ چاردے مست طالبانک داضلع غا مربوط جلہو آتا چرجوئی نا بناءِ کریسر۔ اسہ تُو اس مست ہم طالبانک دا ضلع غا کوزہ کریسر و اوغان سیکورٹی فورسز آک گڈ اٹی اسہ بھلو آپریشن اسے آن گڈ طالبان تے پسپا کریسر ۔ سویلی صوبہ ہلمند اٹی طالبان و فوج انا نیام اٹ جھیڑہ غاتا چرجوئی برجاءِ وخت اس کہ صوبائی پولیس چیف اسہ بمب دھماکہ اسے ٹی زرس بچا ۔

اوغان کمامدارآتا رداٹ جنگ اٹی اوغان اسپیشل فورسزآتا کارندہ غاک ہم بشخ ہلنگ ءُ۔ پولیس نا رداٹ تدوک آ دے صوبائی پولیس چیف آقائے نور اسہ بمب جلہو اسے ٹی زرس بچانے۔ کمامدار آک پاریر کہ ہلمند ہائی وے آ مروک آ دا جلہو اٹی مسہ پولیس کارندہ ٹھپی مسر۔ داوخت اسکان اسہ تنظیم یا رڑاس ہم جلہو نا زمہ واری ءِ امنا کتہ نے۔ اوکان بیدس دیکی صوبہ ہرات اٹی دھماکہ خیز مواد آتا ترخنگ آن 7 عسکریت پسند تپاخت کریر۔ صوبائی گورنر نا ترجمان پارے کہ واقعہ پاسابند انا علاقہ ٹی ہمووخت آ پیش بس ہراتم عسکریت پسند آک اسہ بمب اس تخارہ۔ کمامدارآتارداٹ واقعہ ٹی 7 بندغ تپاخت و مسہ ٹھپی مسنو۔