ینگون(پاکستان نیوزپوائنٹ 12جون2017ء) میانمار بے گواہ مروک آ فوجی جہاز آن پین 26بندغ نا لاش دوئی مسنے ہراڑآن تپاخت کروک آتا کچ ودسا 59مس۔ جہاز اٹی فوجی و اوفتا خاہوت آتا باسک و جہاز انا عملہ تون اوار 122بندغ سوارئسر۔ چینی خبر رساں ادارہ نا رداٹ میانمار نا کمانڈر ان چیف اسہ بیان اسے ٹی پارینے کہ تدوک آ دے پین 26لاش دوئی مسنے ہراڑآن داوخت اسکان تپاخت کروک آتا کچ ودسا 59مسنے۔
لاش آتے طبی معائنہ کن داوی فوجی ہسپتال آ گدرینگانے۔ بیان نا رداٹ تپاخت کروک آتیٹی 26نرینہ، 23نیاڑی، 9 چناءُ وخت اس کہ اسٹ اس درست متنے۔ بیان نا رداٹ موسمی حالیت گچین مننگ نا سوب پٹنگ نا کاریم برجاءِ ہراٹی فضائیہ نا 5جہاز، 2ہیلی کاپٹر و 9 بحری جہاز بشخ ہلنگ ءُ۔ یات سلے کہ میانمار نا فضائیہ نا ٹرانسپورٹ جہاز گدرینگوک آ چارشنبے آ تانن تھرائی نا علاقہ ٹی بے گواہ مسوسس ہراٹی فوجی کارندہ و اوفتا خاہوت نا 108بندغ تون اوار 122بندغ سوارئسر۔ بنائی جاست وپاست آن معلوم مریک کہ جہاز تمسا بھس مسنے ولے شکست نا جاست وپاست جاری ءِ۔
