کابل (پاکستان نیوزپوائنٹ 10اگست 2016ء) اوغانستان نا صوبہ ہلمند اٹی سیکورٹی فورسز و عسکریت پسند آتا نیام اٹ جھیڑہ غاتا چرجوئی برجاءِ ، کمامدارآک ہلمند اٹی ہندی کمانڈر تون اوار 37طالبان ءِ تپاخت کننگ نا داوا کرینو ، گورنر ہلمند نا ہنکین جاٹ آ جلہو ءِ فورسزآک پسپا کریر ، بدخشاں ٹی فضائی کارروائی نا وخت آ 26 طالبان تپاخت کریر، اوغان وزارت دفاع داعش نا خراسان شاخ انا سروک ءِ تپاخت کننگ نا داوا کرینو۔
اوغان میڈیا نا رداٹ کمامدار آک پاریر کہ ہلمند نا مسہ ضلع ٹی سیکورٹی فورسز و طالبان تا نیام اٹ جھیڑہ نا چرجوئی پدریسہ جاری ءِ۔ داجھیڑہ غاتیٹی اسہ فوجی اس تپاخت و پنچ انا ٹھپی مننگ نا تصدیق کننگانے۔ کمامدارآک پاریر کہ ضلع نادعلی، گارم سیف و ضلع نواٹی جھیڑہ غاتا چرجوئی داوخت اسکان جاری ءُ و جنگ اٹی اسہ ہندی کمانڈر اسے تون اوار 37 طالبان تپاخت کرینو۔
صوبائی گورنر نا ترجمان پارے کہ ضلع نواٹی گورنر نا ہنکین جاٹ آ طالبان نا اسہ بھلو جلہو اسے پسپا کننگانے ۔ دا جلہو اٹی 10 جلہو گیر تپاخت و 13ٹھپی مسنو۔ قطب دے ٹکی صوبہ بدخشاں ٹی فضائی جلہو نا وخت آ 26عسکریت پسند تپاخت و 10 ٹھپی مسنو۔ اوغان میڈیا کمامدارآتا بابت تینا رپورٹ آتیٹی پارینے کہ فضائی کارروائی ضلع راغستان اٹی کننگا ہراٹی احوال آتا رداٹ 26 جنگوڑو خلنگانو۔
طالبان نا کنڈآن داوخت اسکان داخبر نا تصدیق یا تردید کننگ تنے۔ داکان بیدس اوغان وزارت دفاع شدت پسند تنظیم داعش نا خراسان شاخ انا سروک حافظ سعید نا تپاخت نا داوا کرینو ۔ اوغان وزارت دفاع نا ذرائع پارینے کہ حافظ سعید منہ دے مست اسہ کارروائی اسے ٹی خلنگانے۔ دے ٹکی اوغانستان اٹی تعینات اوغان فوج انا اسہ بڑزکو عہدیدار جنرل زمان وزیری اسہ انٹرویو اسے ٹی پارے کہ حافظ سعید ءِ دے ٹکی صوبہ ننگرہار نا ضلع آچین اٹی اسہ کارروائی اسے نا وخت آ تپاخت کننگا۔ داکارروائی ٹی 30پین بندغ تپاخت کریر واہم آزادانہ ذرائع آن داخبر نا تصدیق مننگ کتنے۔ اوغان کمامدارآک داکان مست ہم حافظ سعید نا تپاخت نا داوا ءِ کریسر۔
