ہانگ کانگ(پاکستان نیوزپوائنٹ 18مئ2017ء) وزیراعظم محمد نواز شریف چین وہانگ کانگ نا دورہ ءِ پورو کننگ آن پد پنچ شنبے نا دے داڑے وطن آ پدی رادہ مس۔ ہانگ کانگ نا بالی پٹ آ بڑزکو کمامدارآک وزیراعظم ءِ رخصت کریر۔ وزیراعظم بیجنگ اٹی ون بیلٹ ۔ون روڈ فورم اٹی شرکت کن چینی صدر شی جن پنگ نا سلہ غا چین نا دورہ ءِ کرے۔ محمد نواز شریف بیجنگ اٹی بیلٹ اینڈ روڈ فورم اٹی ایلو جہانی راہشون آتون شرکت و کلیدی تران کرے۔
وزیراعظم محمد نواز شریف لی کی چیانگ تون اوڑدہی ہم رکے۔ داوخت آ او چندی جہانی راہشون آتون اوڑدہی ہم کرے ہرافتے ٹی ہڑتوم آ کنڈآتا تعلقداری و ڈیہہ نا حالیت آتیا خیال آتا درشانی مس۔ یات سلے کہ بیلٹ اینڈ روڈ فورم نا بناء چین نا صدر شی جن پنگ 2013ء ٹی کریسس۔ دا فورم شاہراہ ریشم اقتصادی راہداری و 21می صدی نا سمندری راہداری پروگرام نا بشخ اسے۔
بیلٹ اینڈ روڈ فورم نا مسخت اسیجائی شونداری ہدف آتا دوئی و کمکاری ءِ ودفوئی ءِ۔ محمد نواز شریف چین نا شار ہینگ ژو نا ہم دورہ ءِ کرے ہراڑے او پنی ایل پورٹل ”علی بابا“ ہیڈ کوارٹر نا دورہ ءِ کرے و قول و اقرار آتیا دستخط نا دود اٹی شرکت کرے۔ اوکان پد تینا دورہ نا ارٹ میکو مرحلہ غا وزیراعظم ہانگ کانگ اٹی کاروباری شخصیت آتون اوڑدہی آن بیدس زرکاری کانفرنس آن ہم تران کرے۔
