ہانگ کانگ(پاکستان نیوزپوائنٹ 17مئ2017ء) وزیراعظم محمد نواز شریف تون چارشنبے نا دے ہانگ کانگ نا چیف ایگزیکٹو لیونگ چن ینگ اوڑدہی کرے۔ داوخت آ تین پہ تینی است خواہی نا معاملہ و چندی بشخ آتیٹی ہڑتوم آ کنڈآتا کمکاری نا مون آ دننگ کن خیال آتا درشانی ءِ کننگا۔ وزیراعظم سے شنبے نا دے ہانگ کانگ نا مسہ دے ئی دورہ غا سرمسوسس۔ بنجائی وزیر انجینئر خرم دستگیر خان ، چین اٹی پاکستان نا سفیر مسعود خالد، زرکاری بورڈ انا چیئرمین مفتاح اسماعیل تون اوار ایلو بڑزکو کمامدارآک ہم وزیراعظم تون اوارءُ۔
ہانگ کانگ نا چیف ایگزیکٹو تون اوار وزیراعظم تون اوڑدہی کروک آ تیٹی ہانگ کانگ نا سیکرٹری خزانہ پال چن موپو، بیلٹ اینڈ روڈ یون چوئی ینگ پک انا کمشنر و سیکرٹری خزانہ ئسک ہم ساڑی ئسر۔ گورنمنٹ ہاؤس اٹی بننگ نا وخت آ وزیراعظم ءِ بخیر چیف ایگزیکٹو کرے۔ ہڑتوم آ راہشونک جم و جوش اٹ جوڑ بڑکریر و وزیراعظم مہمان تا کتاب اٹی تینا تاثرآتے نوشتہ کرے۔
اوڑدہی نا وخت آ ہڑتوم آ راہشونک تین پہ تینی است خواہی نا معاملہ و ہڑتوم آ کنڈآتا رابطہ غاتا مون آ دننگ آ خیال آتا درشانی ءِ کریر۔ داوخت آ ہیت وگپ کرسا وزیراعظم محمد نواز شریف پارے کہ پاکستان و ہانگ کانگ نا برادرانہ تعلقداریک ءُ و ہانگ کانگ اونا پسندیدہ انگا ملک ءِ ۔ اوپارے کہ پاکستان تون ہانگ کانگ تون سوگوتعلقداریک ءُ و ہڑتوم آ ملک آتا واپاری و اقتصادی رابطہ غاتیٹی ودکی نا بھلو گمان اس ساڑی ارے۔
او چندی بشخ آتیٹی ہڑتوم آ کنڈآتا کمکاری نا مون آ دننگ اٹی ودکی نا گرج آ زور شاغا وزیراعظم محمد نواز شریف پارے کہ ہانگ کانگ نا کیہی کمپنیک پاکستان اٹی خذمت سرانجام تننگ ءُ ہراڑآن پاکستان آ اوفتا پت انا عکاسی مریک اوپارے کہ چین پاکستان اقتصادی راہداری نا کمک اٹ گوادر آن جہانی واپار نا مون آ دننگ اٹی کمک رسینگک۔ وزیراعظم پارے کہ پاکستان اٹی جامع و آزادانہ اقتصادی و واپاری پالیسی مرتب کرینے۔
ہرافتیان ہانگ کانگ نا زرکار آتے فائدہ ہرفوئی مرے۔ اوپارے کہ ہانگ کانگ نا زرکار آتے سی پیک نا رداٹ مروک آ واپاری سرجز وہڑتوم آ ملک آتا تین پہ تینی واپاری رابطہ غاتیان فائدہ ہرفنگ کن بایدے گام گیج کروئی مرے۔ داوخت آ ہیت وگپ کرسا ہانگ کانگ نا چیف ایگزیکٹو وزیراعظم ءِ ہانگ کانگ آ بننگ آ ببوخیرٹ پارے و پارے کہ ہڑتوم آملک آک چندی بشخ آتیٹی تین پہ تینی کمک کننگ ءُ۔ اوپاکستان و ہانگ کانگ نا اقتصادی کمکاری ٹی پین ودکی نا گرج آ ہم زور شاغار۔
