سرینگر(پاکستان نیوز پوائنٹ 09 اگست2016ء) مقبوضہ کشمیر اٹی کل جماعتی حریت کانفرنس نا چیئرمین سید علی گیلانی و حریت راہشون شبیر احمد شاہ و آسیہ اندرابی کوئٹہ ٹی ہولناک بمب دھماکہ ٹی بھلو کچ اسے آ انسانی زند آتا زیان آ افسوز ظاہر کرسا پارینو کہ کوئٹہ ٹی دہشت گرد جلہو اٹی بھارتی اودیم ایجنسی را اوڑدہ ءِ۔ کشمیر میڈیا سروس نا رداٹ سید علی گیلانی و شبیر احمد شاہ سرینگر اٹی جاری تینا جتا جتا بیان آتیٹی کوئٹہ ٹی دہشت گرد آتا بہیمانہ و غیر انسانی کارروائی نا ترندی اٹ مذمت ءِ کریر ہراٹی 70 آن زیات بندغ شہید و سد آن زیات ٹھپی مسنو۔
اودھماکہ ٹی شہید مروک آ بندغ آتا درجہ غاتا بڑزی و ٹھپی تا زوت جان جوڑی کن دعا کریر۔ دختران ملت نا سروک آسیہ اندرابی سرینگر اٹی جاری اسہ بیان اسے ٹی پارے کہ ہراہراوخت آ پاکستان کشمیری تا حق آ مبنی جہد آجوئی نا حق ٹی تینا فرض ءِ پورو کننگ نا عملاسعی کیک تو بھارتی اودیم ایجنسیک اسہ دم ارض پاک آ دہشت گرد جلہو کرسا اونا توجوہ ءِ کشمیر نا ویل آن اسہ کنڈ کرسا ملک انا تہہ ٹی کیرہ۔
اوپارے کہ وادی کشمیر و جموں نا مسلم اکثریتی علاقہ خاص کر ڈوڈہ ، بھدروہ ، کشتواڑ، ٹھاٹھری ، بانہال، پونچھ و راجوری ٹی بھارتی فورسز آتا دوتے اٹ بھلو کچ اسے آ ظلم و بربریت نا ہرابازار ءِ گرم کرینو اونا مثال ملنگ بھاز ممکن ءِ۔ آسیہ اندرابی کشمیری نیاڑی تیان ہم خواست کرے کہ او حریت سروک نا کنڈآن پڑوکروک اسیجائی پروگرام آتے پبی شرکت نا کمک اٹ سرسہب جوڑ کیر۔ ہموڑے پیروان ولایت نا سروک مولانا سبط محمد شبیر قمی ہم اسہ بیان اسے ٹی کوئٹہ ٹی پیش بروک آ انسانیت سوز دہشت گرد جلہو اٹی کودک و معصوم خلقت آتا خون آ ڈکھ و غم نا درشانی ءِ کرسا داواقعہ نا سخت انگا لوز آتیٹی مذمت ءِ کرینے۔
