مصر اتون تعلقداریک مست آن زیات مستحکم و سوگو ءُ سعودی وزیر خارجہ نا مصری ہم منصب تون اوار پریس کانفرنس

مصر اتون تعلقداریک مست آن زیات مستحکم و سوگو ءُ سعودی وزیر خارجہ نا مصری ہم منصب تون اوار پریس کانفرنس

ریاض(پاکستان نیوز پوائنٹ 24اپریل2017ء) سعودی عرب نا وزیر خارجہ عادل الجبیر پارینے کہ مملکت نا مصر اتون تعلقداری مست آن زیات مستحکم و سوگو ءِ۔ العربیہ ٹی وی نا رداٹ سعودی وزیر خارجہ الجبیر داخیال آتا درشانی ءِ تینا مصری ہم منصب سامح شکری تون اوار اسہ اسیجائی ءُ پریس کانفرنس اسے آن تران اٹی کرے۔ عادل الجبیر پارے کہ سعودی عرب و مصرانا نیام اٹ تعلقداری سوگو ومستحکم ءِ، ساڑی آ وخت آتیٹی ذرائع ابلاغ اٹی سعودی عرب و مصر انا نیام اٹ تعلقداری تا شک و شبہ تالان کننگ نا کوشست کننگا۔

اوپارے کہ ہڑتوم آ برادر مسلمان مک آتا تین پہ تینی تعلقداری ٹی شک و شبہ ناہچ ءُ گنجائش اس اف۔ ہڑتوم آ ملک تاریخی و اسٹریٹجک تعلقداری تے پین سوگوکیرہ۔ الجبیر پارے کہ سامح شکری تون اوڑدہی ٹی شام، عراق، یمن و لبیا کون آ دمدستی و ایسر نا چاری ویل آتیا خیال آتا درشانی کننگا۔ عرب ملک آتیٹی جاری شورش نا بابت سعودی عرب و مصر نا موقف اسٹ ءِ۔

داوخت آ مصری وزیر خارجہ سامح شکری پارے کہ سعودی عرب ومصر انا مزل اسٹ ءِ۔ اوہڑتوم آ ملک آتا نیام اٹ کمکاری ءِ پین ودفنگ نا گرج آ زورشاغا۔ سامح شکری نا پاننگ ئس کہ مصری وزیر خارجہ عادل الجبیر تون اوڑدہی ٹی تین پہ تینی است خواہی نا غٹ اہم معاملہ غاتیا خیال آتا درشانی کننگا۔ ہڑتوم آ ملک آتا سروک آک رابطہ غاتے برجاتخنگ و کمکاری ءِ مون آ دننگ آ امنا کرینو۔ مصری وزیر خارجہ نا پاننگ ئس کہ سعودی عرب و مصر انا عرب اقوام نا سلامتی نا بابت موقف اٹی ہم آہنگی ءِ۔ اوپارے کہ ہڑتوم آ وزیر خارجہ غاتا نیام اٹ مستین اٹی مروک آ اوڑدہی تیا ہم گونڈءُ خیال آتا درشانی اس کننگا۔