نیویارک(پاکستان نیوز پوائنٹ 24اپریل2017ء) خیراتی ادارہ غاتے عطیہ غاتا بابت پاکستان اٹی مثالی ءُ چاگڑد اس خننگک۔ داہیت ءِ اقوام متحدہ ٹی پاکستان نا آخبتی مندوب ڈاکٹر ملیحہ لودھی نیویارک نا مضافاتی علاقہ ہکس ول اٹی اسہ دوداسے آن تران اٹی پارے۔ اوپارے کہ ضرورت مند آتے بے سود کڑز تروک آ ادارہ اخوت ہم نادار پاکستانی شاری تے تینا نت تیا سلفنگ اٹی کمک تننگ اٹی ءِ۔
دا ادارہ انسانی وقار آ یخین تخک۔ اخوت، سٹیزنز فاؤنڈیشن و ڈی آئی ایل کون آ ادارہ غاک پاکستانی شاری تے لمہ وطن نا خذمت نا موقع فراوان کیک۔ صدقہ و خیرات نا بابت پاکستان اٹی مثالی ءُ چاگڑد اسے، پاکستانیک فیاض خلقت ءُ و ہنداسوب ءِ کہ پاکستان نا شمار ہموملک آتیٹی مریک ہراڑے غٹ آن زیات صدقہ و خیرات کننگک۔ اوپارے کہ بے شک ننے بے شمار چیلنج آک مون تروک ءُ ولے نن دا بے شمار نعمت آتے ہم بایدے مون آ تخن ہرا ننا ملانو و دانعمت آتا شکر ءِ ادا کننگ کن نن بایدے است انا ھب اٹ خیرات کین۔
اوپارے کہ دُن تو تنقید ننا حق ءِ ولے ہراخامی آ نن تنقید کننگ اُن اودے سہی کننگ ہم ننا زمواری ءِ۔ حب الوطنی نا بڑزکو انگا دروشم بدلی ٹی تینا کڑد ءِ ادا کننگ و راج انا محروم تپہ غاتا کمک ءِ و اخوت ہندا ہی بڑزکو اقدار نا علمبردار ءِ۔ داوخت آ ڈاکٹر ملیحہ لودھی اخوت نابانی ڈاکٹر امجد ثاقب ءِ اونا شاندار خذمت آتیا خراج تحسین پیش کرے۔ صوبہ پنجاپ و گلگت بلتستان نا حکومت آک ہم اخوت نا خذمت آتیان فائدہ ہرفینو۔ اخوت نا نادار طالب علم آتے کڑز آتا فراوانی نا پروگرام ہم شاندار ءِ۔ ہکس ول اٹی دا دود انا بست و بند ءِ اخوت نا بانی ڈاکٹر امجد ثاقب کریسس۔
