واشنگٹن(پاکستان نیوز پوائنٹ 23فروری2016ء) عراقی شار موصل نا دے ٹکی ٹی اسہ اسکول اسے آ دہشت گرد تنظیم داعش نا جلہو اٹی 3 چناوخت اس کہ امریکی سیوتی جلہو اٹی داعش نا کمانڈر آتون اوار 19 دہشت گرد تپاخت کریر۔ ذرائع ابلاغ نا رداٹ شعبہ انسداد دہشت گردی نا کارندہ رضا الویردی جلہونابابت تینا بیان اٹی پارینے کہ داعش ، محلہ الریفاق اٹی واقعہ یافہ پرائمری اسکول آ ڈورہ جہازآتے اٹ جلہو کرے۔
رضاویردی نا رادٹ جلہو اسکول اٹی چناتا ساڑی گری ٹی مس و جلہواٹی 3 طالب علم تپاخت کرینو ہرافتیان اسٹ نا وئی 7 سال و اِرٹ نا وئیک دہ دہ سال ئسر۔ جلہو آن پد سیکورٹی فورس آک ایلوچناتے اسکول آتیان بحفاظت کشار۔ ایلو کنڈآہسپتال نا ذرائع نا رداٹ جہانی کولیشن فورس آتا اسہ جنگی جہاز اس شار انا دیکی علاقہ الشفانا اسہ پیٹرول اسٹیشن اسے نا خڑک واقع ماڑی ءِ نشانہ کرینو۔ احوال نا رداٹ دا ماڑی دہشت گرد تنظیم تون گنڈوک الفرقان بریگیڈنا ہیڈکوارٹر ئس۔ جلہو ہمووخت آ کننگا ہراتم دہشت گرد تنظیم نا سرغنہ دیوان اتی جمع ئسر و جلہو اٹی تنظیم نا نام نہاد کمانڈرآتون اوار 19 دہشت گرد تپاخت کننگانو۔ تپاخت کروک آ دہشت گرد آتا اسہ بشخ اس درملکی تیا تالان ءِ۔
