اقوام متحدہ ٹی پاکستان نا آخبتی مندوب ڈاکٹر ملیحہ لودھی نا جنرل اسمبلی نا کمیٹی نا دیوان اٹی خیال آتا درشان

اقوام متحدہ ٹی پاکستان نا آخبتی مندوب ڈاکٹر ملیحہ لودھی نا جنرل اسمبلی نا کمیٹی نا دیوان اٹی خیال آتا درشان

اقوام متحدہ(پاکستان نیوز پوائنٹ 22فروری2016ء) پاکستان پارینے کہ اقوام متحدہ نا امن مشن نا سرسہبی نا سیبو ہندن انگا ٹھوس سیاسی گام گیج آتیاٹی ءِ ہرا جھیڑہ غاتیان زہمی علاقہ غاتیٹی جھیڑہ غاتا سیاسی ایسر آ منتج مرے۔ اقوام متحدہ ٹی پاکستان نا آخبتی مندوب ڈاکٹر ملیحہ لودھی جنرل اسمبلی نا کمیٹی نا دیوان اٹی خیال آتا درشانی ءِ کرسا پارے کہ جہانی ادارہ نا پوسکن آ من مشن جھیڑہ غاتیان بچنگ و لس شاری تا رکھ اکن سیاسی سلامتی، انسانی و شونداری پلو آتیا ہم چکار تخنگ ءِ۔

لس شاری تا رکھ انا گچین وڑدادے کہ سلہہ بند جھیڑہ غاتے بناء مننگ کن ہلنگپ۔”جھیڑہ غاتا بنداوی سوب و اوفتا جامع سیاسی ایسری“ نا سرحال آ خیا ل آتا درشانی ءِ کرسا ڈاکٹر ملیحہ لودھی پارے کہ جھیڑہ غاتے بناء مننگ آن تورسا نن پائیدار امن نا کنڈآ پیش رفت کننگ کینہ۔ اوپارے کہ پاکستان اقوام متحدہ نا امن مشن آتے کن دستہ فراوان کروک آ غٹ آن بھلاملک ءِ ہراغٹ آن مست و آخبتی مزاجی اٹ دا مشن آتے کن افرادی واک فراوان کرینے۔ داوخت 7136پاکستان کارندہ اقوام متحدہ نا امن مشن تیٹی خذمت سرانجام تننگ ءُ و داوڑ پاکستان نا شمار امن مشن تے کن سیکورٹی دستہ فراوان کروک آ مسہ بھلا ملک آتیٹی مریک ۔