ایران دفاعی واک اٹی ودکی نا چرجوئی ءِ برجاہ تخک، ایرانی نائب صدر

تہران(پاکستان نیوز پوائنٹ 15فروری2016ء) ایرانی نائب صدر اسحاق جہانگیری پارینے کہ ایران ممکنہ خطرہ غاتا مقابلہ کن دفاعی واک اٹی ودکی نا چرجوئی ءِ برجاہ تخک۔ تہران اٹی ذرائع ابلاغ کن اولیکو ایثار ایوارڈ نا دود آن تران کرسا اسحاق جہانگیری پارے کہ دفاع مقدس نا آزموندہ غاتے مون آ تخسا ایرانی قوم وطن نا دفاع کن المی ازباب و سلہہ غاتا تیاری نا چرجوئی ءِ برجاہ تخک۔ اودا یات دہانی کرفے کہ ایران آ مسلط کروک جنگ اٹی تہران و ملک انا ایلو علاقہ غاک دشمن نا میزائل آتا نشانہ جوڑ مسر و دا میزائل بھلا واک آک عراق نا مسکوہی آمر صدام نا حکومت ءِ فراوان کریسس۔