لندن(پاکستان نیوز پوائنٹ 25اگست 2016ء) پاکستان و انگلینڈ نا کرکٹ ٹیم تا نیام اٹ پنچ اسہ دے ئی بین الاقوامی میچ آتیا تالان سیریز نا ارٹ میکو میچ (پگہ) ہفتہ آ لارڈز، لندن اٹی گوازی کننگک، میچ ڈے مریک و پاکستان نا معیاری وخت انا رداٹ پیشیم نا دونیم بجہ غا شروع مریک۔ میزبان ٹیم ءِ پاکستان نا برخلاف سیریز اٹی 1-0 نا برتری دوئی ءِ۔ انگلینڈ پاکستان ءِ اولیکو ون ڈے میچ اٹی 44 رنز اٹ شکست تسوسس۔
داکان مست ہڑتوم آ ٹیم تا نیام اٹ گوازی مروک آ چار ٹیسٹ میچ آتا سیریز 2-2 اٹ بریبر مسوسس۔ ٹیسٹ سیریز اٹی شون و شان کارکڑد آن گڈ پاکستانی ٹیم آئر لینڈ نا برخلاف ون ڈے سیریز 1-0 آن کٹاسس و گرین شرٹس داسا انگلش ٹیم نا چیلنج آتون مون تننگ کن تیارءِ۔ پاک انگلینڈ ٹیم تا نیام اٹ ون ڈے سیریز نا ارٹ میکومیچ (پگہ) گوازی کننگک، مسٹ میکو میچ 30 اگست آ نوٹنگھم اٹی گوازی کننگک، چارمیکو میچ یکم ستمبر آ لیڈز اٹی گوازی کننگک وخت اس کہ پنچ میکو و آخریکو میچ 4 ستمبر آ کارڈف نا ہند آ گوازی کننگک، اوکان گڈ ہڑتوم آ ٹیم تا نیام اٹ اسٹ انگا ٹی 20 میچ 7 ستمبر آ مانچسٹر اٹی گوازی کننگک۔
