اسلام آباد (پاکستان پوائنٹ نیو ز 29۔جولائی۔2016ء) بنجائی وزیر ڈٹ بندی و شون احسن اقبال پارینے کہ اقتصادی نیزگاری تون اوار اوار ذہنی نیزگاری ءِ ہم چٹفنگ نا گرج ءِ ، پاکستانی قوم ایماندار ءِ، ملک انا شون سیاسی سوگوی و پالیسی تیٹی تسلسل آن بیدس مننگ کپک، بے نظیر انکم سپورٹ پروگرام نیزگاری نا چٹفنگ کن اہم کڑد ادا کننگ ءِ۔ داخیال آتا درشانی ءِ او جمعہ آ بے نظیر انکم سپورٹ پروگرام نا رداٹ پاکستان نا آبادی نا رپورٹ نا دود آن تران کرسا کرے۔
داوخت آ بے نظیر انکم سپورٹ پروگرام نا چیئرپرسن ماروی میمن ہم ساڑی ئسک۔ بنجائی وزیر پارے کہ اسہ خاص ءُ آمدنی سیان کم جنوزان ، چوری و معذور آتا کفالت کن گام ہرفنگ ریاست نا اسہ بھلو عمل اسے۔ اوپارے کہ غٹ ٹک آک داپاننگ ءُ کہ 2016ء نا پاکستان 2013ء نا پاکستان آن گچین ءِ۔ د امثبت سوچ و خوداعتماد قوم اکن بھاز المی ءِ۔ اوپارے کہ نیزگاری نا چٹفنگ اسہ ملک اسے کن اہم کڑدادا کیک، بی آئی ایس پی ملک انا 5کروڑ خلقت آتا مالی کمکاری ءِ کننگ ءِ۔
اوپارے کہ ساڑی آ حکومت 2018 ء اسکان 10ہزار میگاواٹ بجلی قومی گریڈ اٹی اوار کیک۔ حکومت ہائر ایجوکیشن کمیشن نا بجٹ 100 ءِ ودفسا 200 ارب کرینے۔ ہنداوڑ تعلیم نا بشخ آ حکومت خصوصی توجوہ تننگ ءِ۔ اوپارے کہ دا پروگرام نیزگارتا کمکاری کن کاریم کننگ ءِ، بی آئی ایس پی ایشیا ناغٹ آن بھلا پروگرام ءِ ہرا نیزگار تا کمکاری ءِ کننگ ءِ۔ اوپارے کہ پاکستان اٹی بھاز گڑا جوا ن مننگ ءِ ولے ننا میڈیا صرف منفی پلو آتے نشان تننگ ءِ۔
اوپارے کہ ملک اٹی امن و ایمنی نا حالیت آتیٹی پدریسہ گچین تون درملی زرکارآک پاکستان نا پلو ءِ ہلنگ ءُ ، سی پیک ڈٹ انا بدولت ملک اٹی پوسکن ءُ صنعت جوڑ مریک ہراڑآن نہ صرف روزگار نا وارخواہیک ودی مریرہ بلکن داجاگہ نا خلقت آتے معاشی سوگوی نا بدولت شونہالی و گچین معیار زند انا آسراتی دوبریک۔ اوپارے کہ گوادر سی پیک نا گیٹ وے مریک، دادا صدی نا بھلو موقع اسے اودے زیان کننگ کپنہ۔ ڈیہہ نا مسہ ارب الس ءِ اونا فائدہ مریک۔
