کوئٹہ(پاکستان نیوز پوائنٹ 01 فروری2016ء) حکومت بلوچستان نا ترجمان انوارالحق کاکڑ پارینے کہ مظفر برہان وانی نا شہیدی آن پد مقبوضہ کشمیر اٹی آجوئی نا تحریک نا جہد اٹی پین ترندی بسنے، کشمیری الس بھارتی فوج انا بیدادی نا باوجود آجوئی آن کم اسہ ہیت اسے آ ہم راضی افس، کشمیری تا حق خودارادیت نا منصفانہ جہد نا سفارتی ، اخلاقی و سیاسی مخ تفی ءِ برجاہ تخنہ، وزیراعلیٰ بلوچستان نواب ثناء اللہ خان زہری نا خصوصی پارت آتارداٹ مچ آ بلوچستان اٹی مقبوضہ کشمیر نا مظلوم الس تون یکجہتی نا درشانی کن 5فروری آ یوم یکجہتی کشمیر جوش و جوزہ اٹ اڈتننگک۔
داخیال آتا درشانی ءِ او چارشنبے آ ”اے پی پی“ تون ہیت وگپ کرسا کرے۔ انوارالحق کاکڑ پارے کہ کشمیر پاکستان نا شہ رگ ءِ و مقبوضہ کشمیر نا الس تنیا اف بلکن بلوچستان نا الس تون اوار مچ آ قوم کشمیری تا جہد آجوئی ٹی اوفتے تون ہم کوپہ سلوک ءِ ۔ اوپارے کہ بنجائی حکومت اقوام متحدہ نا فورم آ کشمیر نا ویل و بھارتی بیدادی ءِ گچین وڑاٹ جہانی برادری نا مون آ پیش کرے وخت اس کہ سول و عسکری سروک آتا ویژن مقبوضہ کشمیر نا تحریک آجوئی ءِ اسہ پوسکن ءُ جہت اس تسنو و کشمیری الس اٹی روشن سہب انا اسہ پوسکن ءُ عزم و حوصلہ اس ودی مسنے۔
اوپارے کہ مقبوضہ کشمیر اٹی جاری بھارتی فوج انا وحشیانہ بیدادی، بے گناہ کشمیری تا شہیدی و انسانی حق انا سنگین خلاف ورزی تیا اقوام متحدہ و انسانی حق انا جہانی تنظیم تا چُپی معنی خیز و مجرمانہ غفلت ءِ۔
