اسلام آباد(پاکستان نیوز پوائنٹ 31جنوری2016ء) مسکوہی سفیر فوزیہ نسرین پارینے کہ امریکہ نا صدر ڈونلڈ ٹرمپ نا پوسکن آ پالیسی نا برخلاف مچ آ دنیا ٹی برانز نا چرجوئی بناء کرینے۔ ریڈیو پاکستان تون ہیت وگپ کرسا اوپارے کہ مسلمان تا برخلاف سخت پالیسی نا پڑو آن امریکہ تینے تنیائی نا کنڈآدیک۔ اوپارے کہ صدر ٹرمپ کاروباری ءُ بندغ اسے و مچ آ دنیا دا چائک اوپارے کہ ملک آتا نیام اٹ تعلقداری تے مون آ دننگ کن ہیت وگپ و خلقت نا ہن و بر نا چرجوئی بھاز المی ءِ۔
فوزیہ نسرین پارے کہ مسلمان تیا پابندی خلسا امریکہ تینے دنیا آن جتا کیک۔ بھارت نا رویہ نا بابت چست کرو ک آ سوج انا ورندی ءِ ترسا اوپارے کہ امریکی پالیسی نا پداٹ بھارتی لابی مننگ کیک انتئے کہ بھارت ہمیشہ مچ آ دنیا ٹی پاکستان ءِ جتا کننگ ناکوشست کیک و اودے ہمیشہ بوزاٹ کنوئی تمک داوار ہم او داخوائک کہ اوورسیز ٹی پاکستان نا بشخ کم مرے و اودے فائدہ رسینگے۔
