اسلام آباد (پاکستان پوائنٹ نیوز۔28 جولائی۔2016) ایوان بالا ءِ پاننگانے کہ پاکستان اٹی اسہ ملین نا خڑک ہندن ءُ اوغانی ءُ ہرافتا دستاویز ات آتیٹی اندراج اف، داسا فیصلہ مسنے کہ اوغانیک تینٹ تینا خلقت آتا ڈاکومینٹیشن ءِ کیرہ و اوفتے کاغدات ایشو کننگک، رجسٹرڈ اوغان پناہ گزین تا وطن واپسی نا پلان وزارت سیفران جوڑ کرینے۔ پنچ شنبے آ ایوان بالانا دیوان اٹی وقفہ سوج آتا وخت آ سینیٹر احمد حسن نا سوج انا ورندی ٹی بنجائی وزیر سیفران لیفٹیننٹ جنرل (ر) عبدالقادر بلوچ پارے کہ ساڑی آ وخت اٹی پاکستان اٹی 1.5 ملین رجسٹرڈ و اوسطاََ اسہ ملین ہندن ءُ اوغانی ءُ ہرافتا دستاویزات آتیٹی اندراج اف۔
داسافیصلہ مسنے کہ اوغانیک تینٹ تینا خلقت آتا ڈاکو منٹیشن ءِ کیرہ و اوفتے ہموکان کاغدات ایشو کننگک۔ اوغان حکومت آ دا چرجوئی ٹی زور شاغنگ اُن ، اونا کارروائی نا انتظار ءِ۔ وزیراعظم رجسٹرڈ اوغان پناہ گزین آتا پی او آر کارڈز انا معیاد اٹی 31دسمبر 2016ء اسکان ودکی کننگ نامنظوری ءِ تسنے۔ اوکان گڈ پین ہچ ءُ ودیکی اس تننگپک۔ سیکرٹری سیفران نا سروکی ٹی اسہ بین الوزارتی کمیٹی اس جوڑ کننگانے۔
داکمیٹی وزیراعظم نا پارت آتے مون آ تخسا رجسٹرڈ اوغان پناہ گزین آتا دمدستی وطن واپسی نا پلاس اس جوڑ کیک۔ رجسٹرڈ اوغان پناہ گزین آتا دمدستی وطن واپسی نا پلان وزارت سیفران نا کنڈاجوڑ کننگانے۔ اوغان پناہ گزین 30درسد کیس آتے ٹی و70 درسد کیس آتیان پیشن ءُ۔ کیہی پناہ گزین دانگ اینگ تالان مسنو۔ بھاز بھلو کچ اس کراچی، کوئٹہ و اسلام آباد اٹی ءِ۔
