اسلام آباد(پاکستان نیوز پوائنٹ 27جنوری2016ء) وزارت خارجہ مقبوضہ کشمیر اٹی برہان وانی نا شہیدی آن پد حکومت نا کنڈآن کشمیر اٹی بھارتی بیدادی ءِ تالان کننگ نا بابت کارکڑد رپورٹ ءِ قومی اسمبلی ٹی پیش کرے۔ جمعہ آ قومی اسمبلی نا دیوان اٹی شازیہ مری نا سوج انا ورندی ٹی وزارت خارجہ نا کنڈآن پاننگاکہ برہان مظفر وانی نا شہیدی آن پد 10جولائی آ وزیراعظم و دفترخارجہ نا کنڈآن شاری تا برخلاف فورس آتا بیدادی نا پبی مذمت نا بیان جاری کننگا۔
11جولائی آ بھارتی ہائی کمشنر ءِ بٹنگسا مقبوضہ کشمیر اٹی انسانی حق انا خلاف ورزی تیا برانز کننگا۔ ہندا دے پیشن نا ملک پاکستانی مشن آتے کشمیر نا ویل ءِ تالان کننگ نا پارت کننگا۔ 12جولائی آ سلامتی کونسل نا آخبتی باسک آتا سفیر آتے سیکرٹری خارجہ بریفنگ تس۔ 13جولائی آ یورپی یونین و او آئی سی رابطہ گروپ نا باسک آتے بریفنگ تننگا۔ 15جولائی آ بنجائی کابینہ نا دیوان اٹی بھارتی بیدادی نا مذمت ءِ کرسا 20جولائی آ یوم سیاہ نا وڑاٹ اڈتننگ نا فیصلہ کننگا۔
افریقی یونین و دے ٹکی نیامی نا سفیر آتے ہندا دے بریفنگ تننگا۔ کابینہ نا فیصلہ ءِ مون آ تخسا غٹ جہانی ادارہ غاتے مراسلہ نوشتہ کننگا۔ 20جولائی آ بھارتی بیدادی نا برخلاف پاکستان و پیشن نا ملک پاکستانی مشن آتیٹی یوم سیاہ اڈتننگا۔ 22جولائی 2016ء آ جنیوا ٹی ننا آخبتی نمائندہ غاک ڈی جی آئی سی آر سی ءِ چھٹی نوشتہ کریر، 4اگست 2016ء آ ٹھپی بندغ آتا درمان کن ایم ایس ایف نا صدر ءِ وزیراعظم نا سلاہکار چھٹی اس نوشتہ کرے ۔
5اگست آ وزیراعظم ایل او کے، اقوام متحدہ نا سیکرٹری جنرل و یو این ہائی کمشنر انسانی حق ءِ چھٹی نوشتہ کرے۔ 6اگست آ وزیراعظم جہانی برادری نا چکار ءِ پیلٹ گن آتا زہمی تا طبی درمان نا کنڈاترفے۔ 8اگست آ عرب ملک آتا توجوہ مبذول کرفنگ کن سلاہکار خارجہ سیکرٹری جنرل عرب لیگ ءِ چھٹی اس نوشتہ کرے۔ 11اگست آ جہانی کمیونٹی نا چکار ءِ مقبوضہ کشمیر اٹی ٹھپی تے طبی امداد اٹی ودیکی کن توجوہ مبذول کرفے۔
19و 20اگست آ او آئی سی نا سیکرٹری جنرل پاکستان نا دورہ ءِ کرے و کشمیری تا غیر مشروط مخ تفی نا پڑو ءِ کرے و بھارتی بیدادی نا مذمت ءِ کرے۔ 26اگست آ بھارتی بیدادی آ پی فائیو ملک آک و یورپی یونین نا سفیر آتے بریفنگ تننگا۔ 27اگست آ دنیا نا 11اہم دارالحکومت آتا 22خصوصی سفیر آتے گدریفنگ نا منظوری تننگا۔ 29اگست آ وزیراعظم اقوام متحدہ نا سیکرٹری جنرل ءِ چھٹی اس نوشتہ کرے و کشمیر اٹی فیکٹ فائنڈنگ مشن گدریفنگ آ زور شاغا۔
پاکستان 13آن 30ستمبر 2016ء ٹی انسانی حق کونسل نا 33می دیوان اٹی مقبوضہ کشمیر اٹی انسانی حق انا سنگین خلاف ورزی تے پبی وڑاٹ چست کرے۔ 17ستمبر آوزیراعظم انسانی حق انا سنگین خلاف ورزی نا آخبتی باسک ملک آتا سروک آتے چھٹی اس نوشتہ کرے۔ 19ستمبر آ اقوام متحدہ نا جنرل اسمبلی نا 71می دیوان اٹ او آئی سی رابطہ گروپ نا دیوان ہم اڈ ہلک ہراٹی آزاد کشمیر نا صدر ہم ساڑی مس و بھارتی بیدادی آ گڑتی نا درشانی ءِ کننگا۔
21ستمبر آ وزیراعظم اقوام متحدہ نا جنرل اسمبلی نا 71می دیوان آن تران کرے و کشمیر نا ویل ءِ پبی وڑاٹ تالان کرے۔ وزیراعظم نیو یارک اٹی ہڑتوم آ کنڈآتا دیوان آتیٹی کشمیر نا ویل ءِ چست کرے۔ اقوام متحدہ نا سیکرٹری جنرل و ایلو اہم بندغ آتے مقبوضہ کشمیر اٹی سنگین خلاف ورزی تیا اسہ دستاویز اس ہم پیش کرے۔ 3اکتوبر آ پارلیمانی جماعت آتا کل جماعتی کانفرنس اس اڈترسا کشمیر نا الس نا حق خودارادیت آ پاکستان نا اصولی موقف نا اعادہ ءِ کرے۔
5اکتوبر آ اسیجائی پارلیمانی دیوان اس اڈترسا مقبوضہ کشمیر نا حالیت آتیا شرہ کرفنگا۔ 18اکتوبر آ انقرہ، ترکی ٹی او آئی سی نا پارلیمانی یونین نا انتظامی کمیٹی نا دیوان اٹی بھارتی بیدادی نا مذمت و اسیجائی اعلامیہ منظور کننگا۔ 19اکتوبر آ تاشقند اٹی او آئی سی وزرائے خارجہ نا 43می دیوان اٹی بھارتی بیدادی نامذمت کننگا۔ 27اکتوبر آ سری نگراٹی بھارت نا غیر کانودی کوزہ نا برخلاف یوم سیاہ اڈتننگا۔ 3نومبر آ وزیراعظم نا خصوصی کمکار مقبوضہ کشمیر اٹی انسانی حق انا تشویشناک حالیت آتیا اسلام آباد اٹی رہینگوک او آئی سی ملک آتا سفیر آتے بریفنگ تس۔ 4نومبر 2016ء آ خارجہ امور آ وزیراعظم نا خصوصی کمکار پی فائیو ملک آتا سفیر آتے بریفنگ تس۔
