دفتر خارجہ نا ترجمان نفیس زکریا نا ہفتہ وار پریس بریفنگ

دفتر خارجہ نا ترجمان نفیس زکریا نا ہفتہ وار پریس بریفنگ

اسلام آباد(پاکستان نیوز پوائنٹ 26جنوری2016ء) دفترخارجہ پارینے کہ گلگت بلتستان آن چندی دہشت گرد دزگیر کننگ نا احوال آک ءُ ہرا بھارتی اودیم ایجنسی ”را“ کن کاریم کریرہ۔ دزگیر دہشت گرد آک چین پاکستان اقتصادی راہداری (سی پیک )ڈٹ ءِ لتاڑنگ خوائسرہ۔ پاکستان پوسکن آ امریکی انتطامیہ تون اواری اٹ کاریم کننگ کن تیار ءِ، پاک امریکہ تزویراتی مذاکرات نا رداٹ کیہی بشخ آتیٹی ہیت وگپ مننگ ءِ، پاکستان و بھارت نا نیام اٹ کشمیر بنداوی جھیڑہ ءِ، کشمیر نا ویل ءِ ایسر کننگ آن بیدس ڈیہہ ٹی پائیدار امن اڈ ہلنگ کپک، پاکستان نا پین ملک اسے نا نسبت انسداد دہشت گردی نا گچین ٹریک ریکارڈ ءِ، پاکستان اوغانستان اٹی امن و سوگوی کن پرعزم ءِ۔

اوغانستان اٹی امن وایمنی نا ابتر حالیت نا زمواری تینٹ اوغانستان آ خلنگک۔ دفترخارجہ نا ترجمان محمد نفیس زکریا پنچ شنبے آ داڑے ہفتہ وار پریس بریفنگ اٹی پاکستان اٹی بھارتی نیام تمنگ نا بابت اسہ سوج اسے نا ورندی ءِ ترسا پارے کہ بلوچستان اٹی دزگیر بھارتی سینئر انٹیلی جنس افسر کلبھوشن یادیو آن جاست وپاست اٹی معلومداری نا بنداو آ کارروائیک برجاہ ءُ، کلبھوشن یادیو نا تروک آ معلومداری تا بنداو آ دستاویز (ڈوزیئر) تیار کننگاسس ہرا اقوام متحدہ و ایلو جہانی ادارہ و ملک آتے تننگانے۔

ترجمان پارے کہ پاکستان نا پین ملک اسے نا نسبت انسداد دہشت گردی نا گچین ٹریک ریکارڈ ءِ۔ اوپارے کہ گلگت بلتستان آن چندی دہشت گرد دزگیر کننگ نا احوال آک ءُ ہرا بھارتی اودیم ایجنسی”را“ کن کاریم کریرہ، دزگیر دہشت گرد آتا کاریم چین پاکستان اقتصادی راہداری (سی پیک)( ڈٹ ءِ لتاڑنگ نا ئس۔ دفترخارجہ نا ترجمان پارے کہ بھارت اڑی جلہو نا دوبہ ٹی مبینہ وڑاٹ دزگیر مظفرآباد نا اِرا چناتا بابت جہانی میڈیا و تینا ادارہ غاتے غلط معلومداری فراوان کریر ہرافتے تینٹ بھارت نا تینا ہی ادارہ غاک مسترد کرینو، بھارتی میڈیا ہم دا چناتے کم وئی و بے گناہ گوندانے، دہلی ٹی ساڑی پاکستانی ہائی کمیشن بھارتی کمامدارآتون رابطہ غاتیٹی ءُ، اوفتا چناتون رابطہ ہم کرفنگانے، 29نومبر 2016ء آ اولیکو وار داچنا تسکان رسینگ خوائنگا، داچناتا اوفتا خاہوت نا بندغ آتون ہیت وگپ ہم کرفنگانے۔

ترجمان پارے کہ پاکستان پوسکن آ امریکی انتظامیہ تون اواری اٹ کاریم کننگ کن تیار ءِ، امریکہ تون کیہی بشخ آتیٹی کمکاری ساڑی ءِ، تزویراتی مذاکرات نا رداٹ کیہی بشخ آتیٹی ہیت وگپ مننگ ءِ۔ اسہ سوج اسے آ ترجمان پارے کہ جہانی اقتصادی فورم نا سلہ نامہ نا بابت میڈیا نا گڑاس بشخ آتیٹی شینک مروک آ خبر تیٹی ہچ ءُ راستی اس اف ، جہانی اقتصادی فورم نا چھٹی (سلہ نامہ) دفترخارجہ نا ویب سائٹ آ ساڑی ءِ، دابابت اخباری خبر درست اف، وزیراعظم ہاؤ س آن ہم دا خبر تا تردید بسنے۔

پوسکن آ امریکی انتطامیہ نا بابت اسہ سوج اسے نا ورندی ٹی دفترخارجہ نا ترجمان پارے کہ نن پوسکن آ امریکی انتطامیہ تون اواری اٹ کاریم کننگ کن تیار اُن، ننے اومیت ءِ پاک بھارت تعلقداری خاص کر کشمیر نا ویل انا ایسری کن پوسکن آ امریکی انتظامیہ تینا کڑد ءِ ادا کیک۔ ترجمان پارے کہ پاکستان و بھارت نا نیام اٹ کشمیر نا ویل بنداوی جھیڑہ ءِ، ہراڑآن ڈیہہ نا امن ءِ خطرہ ءِ، ہراوخت اسکان داویل ایسر مفک ہمو وخت اسکان دا ڈیہہ ٹی پائیدار امن اڈ ہلنگ کپک۔

بنگلہ دیش نا بابت اسہ سوج اسے نا ورندی ٹی ترجمان نا موقف ئس کہ پاکستان اٹی بنگلہ دیش نا سفارتی عملہ نا سیکورٹی ءِ ودفنگانے۔ دا سکیورٹی کراچی ٹی بنگلہ دیش اٹی ڈپٹی ہائی کمشنر نا کمپاؤنڈاٹی کریکر نا ساڑی گری نا احوال آ ودفنگانے، 24جنوری آ بنگلہ دیش نا کراچی ٹی ہائی کمشنر رپورٹ کرے کہ ہائی کمیشن اٹی کریکر خسنگا ولے ہائی کمیشن نا تروک آ معلومداری آن دا ثابت مفننگ ءِ کہ کریکر پیشن آن خسنگاسس۔

ترجمان پارے کہ وزیراعظم پارت کرینے کہ اوغان مہاجر آتے باعزت وڑاٹ پدی رادہ کننگک۔ ترجمان پارے کہ سعودی عرب اٹی دہشت گردی نا دوبہ ٹی دزگیر پاکستانی تا معاملہ غان معلومدار ءِ ، دزگیر پاکستانی تا بابت سعودی کمامدارآتون رابطہ ٹی ءِ۔ اوپارے کہ پاکستان و سعودی عرب نا نیام اٹ انسداد دہشت گردی نا بابت میکنزم ساڑی ءِ۔