اسلام آباد(پاکستان نیوز پوائنٹ 24جنوری2016ء) صدر مملکت ممنون حسین پارینے کہ نیاڑیک صنفی امتیاز آن ایڑتر مرسا واپاری سرجزآتیٹی بشخ ہلیر و مسابقت نا فضاء ٹی کاریم کیر تانکہ اوفتا پت اٹی ودکی مرے۔ اوداہیت ءِ سے شنبے آ ایوان صدر اٹی شہلاجاوید اکرم نا سروکی ٹی ویمن چیمبر آف کامرس اینڈ انڈسٹری لاہور نا ڈل اتون اوڑدہی ٹی پارے ہراٹی ویمن چیمبر نا صدر شازیہ سلیمان ہم اوار ئس۔
صدر مملکت پارے کہ نیاڑی تے کاروبار نا زیات آن زیات آسراتی فراوان کننگ کن فیڈریشن آف پاکستان چیمبرآف کامرس نا خذمت دوئی کننگے تانکہ نیاڑی تے کاروبار نا وارخواہی ملنگ کے۔ اوڈل اتون ہیت وگپ کرسا پارے کہ ہراہم کاروبار ءِ کننگے اوٹی ایمانداری و سچائی اختیار کننگے انتئے کہ داڑآن بیدس راج شون ہلنگ کپک۔ صدر مملکت پارے کہ واپار و کاروبار نا شونداری کن المی ءِ کہ سوسائٹی ءِ بدعنوانی آن پاک کننگے و دُن انگا عنصر آتے منظر عام آ اتنگے تانکہ اوفتے سخت آن سخت سزاتننگ مرے۔
اوپارے کہ نیاڑیک بدعنوانی نا چٹفنگ کن بھاز گچین کڑد ادا کننگ کیرہ انتئے کہ پوسکن آ نسل انا تربیت نا فرض ءِ نیاڑیک ہی انجام ایترہ۔ صدر مملکت نیاڑی تا کاروبار نا شونداری کن ٹریڈ ڈویلپمنٹ آف پاکستان آن ہم شونداری بجٹ اٹی بشخ تخنگ نا یخین دہانی کرفے۔ داوخت آ صدر مملکت ڈل ءِ پارے کہ ورلڈ ہیلتھ آرگنائزیشن نا منظور شدہ لیبارٹری بھاز زوت تینا کاریم نا بناءِ کیک ہراڑآن بھاز انگا بشخ آتیٹی کمک رسینگک۔
صدر مملکت وزارت واپار نا کمامدار آتے پارت کرے کہ او نیاڑی تا است خواہی نا کاروبار نا مون آ دننگ کن خصوصی گام گیج کے و ویمن چیمبرکن ریسرچ ونگ نا اڈتننگ کن کمک کے۔ اوداوخت آ پارے کہ نیاڑیک سائنس و ٹیکنالوجی نا تعلیم آ خصوصی چکار کیر تانکہ دابشخ اٹی او ترندی اٹ مون آ ہِننگ کیر۔
