اسلام آباد(پاکستان نیوز پوائنٹ 20نوری2016ء) ایوان بالا نا دیوان اٹی پاکستان پیپلزپارٹی نا سینیٹر ڈاکٹر بابر اعوان گدرینگوک آ سوج آ ضمنی سوج کننگ نا موکل تفننگ آ دیوان نا صدر نشین مولانا عبدالغفور حیدری نا برخلاف احتجاجاََ واک آؤٹ کرے۔ جمعہ آ ایوان بالا نا دیوان اٹی وقفہ سوج آتا وخت سینیٹر ڈاکٹر بابر اعوان گدرینگوک آ سوج آ ضمنی سوج کننگ نا موکل خوائس۔
چیئرمین نا وار وار منع کننگ نا باوجود او بیدس مائیک نا ہیت کرسا کرے و پارے کہ او مفاد عامہ غاہیت کننگ خوائک۔ چیئرمین مولانا عبدالغفور حیدری پارے کہ داوڑوڈول غلط ءِ و پارلیمانی روایت آتا برخلاف ءِ۔ چیئرمین اودے ہیت کننگ نا موکل تتو ہراڑآ او احتجاجاََ واک آؤٹ کرے ۔ چیئرمین بنجائی وزیر پارلیمانی امور شیخ آفتاب احمد ءِ پارت کرے کہ اودے خوش کرسا ایوان اٹی اتے۔ داکان پد ایوان اٹی بننگ آن پد چیئرمین اودے سوج کننگ نا موکل تس۔ سینیٹر ڈاکٹر بابر اعوان بے تعلقدار ءُ سوج اس کرے ہراڑآ وزیر مملکت داخلہ انجینئر بلیغ الرحمان پارے کہ شاید سینیٹر قواعد ءِ گیرام کرینے۔ او غیر تعلقدار سوج اس کرینے ۔
