اسلام آباد(پاکستان پوائنٹ نیوز۔27 جولائی۔2016) وزیراعظم محمد نواز شریف کشمیری تا حق خودارادیت کن پاکستان نا اخلاقی و سفارتی کہول آ تائید و مخ تفی ءِ برجاء تخنگ نا عزم انا اعادہ ءِ کرسا پارے کہ ننا است مقبوضہ کشمیر نا ایڑ و ایلم تتون دھڑکک و نن اوفتا شانہ بشانہ سلوک اُن، کشمیر نا ویل اقوام متحدہ نا بے پورو ایجنڈا ءِ ، کشمیری تا حق خودارادیت اقوام متحدہ نا قرارداد آتارداٹ اوفتا بنداوی حق ءِ و پاکستان تینا ایلم تا دا حق ءِ بین الاقوامی کہول آ ہرفورم آ چست کیک، آزاد کشمیر نا پوسکن گچین مروک حکومت ءِ ادارہ غاتا سوگوی، شفاف و کرپشن آن پاک میرٹ آ مبنی نظام حکمرانی ءِ باوری جوڑ کروئی مرے ہراڑکن اسہ ایماندار و قابل کابینہ اسینا جوڑ کننگ المی ءِ تانکہ کشمیر نا تاریخ اٹی ننا دا حکومت نادور ”شونداری دور“ انا حیثیت آن یات تخنگے۔
اوداہیت ءِ چارشنبے آ داڑے آزاد جموں و کشمیر نا پوسکن گچین مروک آ باسک کانو دساز اسمبلی تون وزیراعظم ہاؤس اٹی اوڑدہی نا وخت آ ہیت وگپ کرساپارے ہراٹی غٹ سرسہب کشمیری پارلیمنٹرینز ، سینیٹ اٹی قائد ایوان راجہ ظفرالحق ، وزیر دفاع خواجہ محمد آصف ، وزیر خزانہ محمد اسحق ڈار، وزیر داخلہ چوہدری نثارعلی خان، وزیر اطلاعات و نشریات سینیٹر پرویز رشید ، وزیر ریلوے خواجہ سعد رفیق، وزیر امور کشمیر وگلگت بلتستان محمد برجیس طاہر و وزیراعظم نا خصوصی کمکار سیاسی امور ڈاکٹر آصف کرمانی شرکت کریر۔
وزیراعظم غٹ پوسکن گچین مروک باسک آتے آزاد جموں و کشمیر نا لس گچین کاری تیٹی نمان سرسہبی آ دلی مبارکباد پیش کرے و گچین کاری تیٹی اوفتا خواری و سیاسی جہد ءِ خراج تحسین پیش کرے۔ وزیراعظم پارے کہ ہرا جوزہ آن اوفک گچین کاری مہم ءِ چلیفیر او ستاکڑزک۔ داوخت آ وزیراعظم محمد نواز شریف باسک آتون پارے کہ دا اوفتا خوش قسمتی ءِ کہ او کشمیر نا آزاد فضاتیٹی زند ءِ تدیفیرہ۔
اوپارے کہ ننا است مقبوضہ کشمیر نا ایلم تتون دھڑکک و نن اوفتا شانہ بشانہ سلوک اُن۔ وزیراعظم پارے کہ پاکستان اٹی شونداری ڈٹ آتیٹی ہرا معیار ءِ تخنگانے اودے آزاد کشمیر اٹی ہم برقرار تخنگک۔ آزاد کشمیر اٹی تعلیم،جان جوڑی و بنداوی ڈھانچہ نا شون اکن ہندا ترندی و توانائی اٹ کاریم کننگکک ہراترندی اٹ پاکستان اٹی کننگ انگ ءِ۔ اوپارے کہ مسکوہی پنچ سال اٹی آزاد کشمیر اٹی ہچ ءُ شونداری کاریم اس کننگ تنے۔ ننا حکومت کشمیر اٹی روڈآتا جال اس شاغک تانکہ ہن وبر آسان مرے۔
