اسلام آباد(پاکستان پوائنٹ نیوز۔27 جولائی۔2016) صدر مملکت ممنون حسین پارینے کہ پاک چین اقتصادی راہداری و توانائی نا ڈٹ آتا پوروی آن کاروبار نا پوسکن ءُ کسر ملنگرہ و روزگار نا وارخواہی ملک، دا چرجوئی ٹی حکومت نا پالیسیک درست سمت اٹی ءُ۔ اوداہیت ءِ چارشنبے آ عاطف اکرام شیخ نا سروکی ٹی اسلام آباد چیمبر آف کامرنس اینڈ انڈسٹری نا ڈل اتون ایوان صدر اٹی ہیت وگپ کرسا پارے۔
صدر مملکت حکومت نا پالیسی تیا پت انا درشانی ءِ کرسا پارے کہ ملک سہی سمت اٹی مون آ ہِننگ ءِ۔ اوپار ے کہ گچین اقتصادی پالیسی تا سوب بین الاقوامی مالیاتی ادارہ غاک پاکستان ءِ مون آ بروک مارکیٹ نا درجہ بندی ٹی اوار کرینو۔ صدر مملکت پارے کہ ساڑی حکومت کاروباری و پوریاگر برادری ءِ سازگار کاروباری چاگڑد فراوان کننگ کن غٹ وسیلہ غاتے کاریم اٹ ہتنگ ءِ۔
صدر مملکت چیمبر نا ڈل ءِ صلاح تس کہ او ملک اٹی عمدہ کارکڑد نا درشانی ءِ کروک آ پوریاگر تے ایوارڈ ایتے تانکہ اوفتے ٹی زیات آن زیات مقابلہ نا رجحان ودی مرے۔ صدر مملکت پارے کہ کاروباری تپہ نا ویل آتا ایسری کن حکومت پبی گام گیج کننگ ءِ۔ اوپارے کہ کاروباری و پوریاگربرادری ءِ تینا مجوزہ خراج تروئی مرے تانکہ اوڑآن دوئی مروک آ کٹیا آن لس بندغ آتے زیات آن زیات آسراتی فراوان کننگ مرے۔ اسلام آباد چیمبر آف کامرنس اینڈ انڈسٹری نا صدر صدر مملکت ممنون حسین ءِ تینا ویل آتیان معلومدار کرے۔ اوحکومتی اقتصادی پالیسی تا ستاءِ کرسا پارے کہ او ملک اٹی اقتصادی حالیت ءِ گچین جوڑ کننگ کن حکومت تون رابطہ ٹی ءِ۔
