اسلام آباد(پاکستان نیوز پوائنٹ 12جنوری2016ء) بنجائی وزیر خزانہ سینیٹر اسحاق ڈار تون گوگل نا ڈائریکٹر پبلک پالیسی اینڈ گورنمنٹ ریلیشنز این لیوین اوڑدہی کرے و پاکستان اٹی معیشت نا ڈیجیٹلائزیشن اٹی گوگل نا کمکاری نا گمان آتیا خیال آتا درشانی ءِ کریر۔ داوخت آ او گدرینگوک آ مسہ سال اٹی پاکستان نا معاشی کارکڑد نا ستاءِ پارے کہ گوگل پاکستان اٹی انفارمیشن ٹیکنالوجی نا شونداری ، ای کامرس نا مون آ دننگ و زرکاری نا ترغیب اٹی کمک فراوان کننگ کیک۔
بنجائی وزیر اودے دا بابت جامع ڈٹ پیش کننگ نا پارے تانکہ دابارواٹی تعلقدار شریدار آتون صلابت کننگ مرے۔ اوپارے کہ حکومت غٹ ہندی و درملکی زرکارآتے بریبری وارخواہی فراوان کننگ کن پرعزم ءِ۔ وزیر خزانہ پارے کہ جہانی پنی ادارہ غاک پاکستان ءِ زرکاری کن ارٹ میکو پرکشش ہند اس گوندنگ ءُ۔ پاکستان اٹی معاشی سوگوی و امن و ایمنی نا گچین حالیت و توانائی نا فراوانی آن کاروبار سرجز و درملکی زرکاری کن چاگڑد سازگار مسنے۔ داوخت آ فنانس ڈویژن و گوگل نا سینئر کمامدارآک ہم ساڑی ئسر۔
