وزیراعظم محمدنواز شریف نا جمہوریہ کرغزستان نا وزیر اقتصادیات جوشیوارزیبک و زوبیکوچ نا سروکی ٹی ڈل اتون ہیت وگپ

وزیراعظم محمدنواز شریف نا جمہوریہ کرغزستان نا وزیر اقتصادیات جوشیوارزیبک و زوبیکوچ نا سروکی ٹی ڈل اتون ہیت وگپ

اسلام آباد(پاکستان نیوز پوائنٹ 12جنوری2016ء) وزیراعظم محمد نواز شریف پارینے کہ گدرینگوک آ مسہ سال اٹی پاکستان نا اقتصادی شرح نمو 4.84آن زیات مسنے و داسہ او درملکی زرکارآتے کن بھلو زرکاری نا وارخواہی اس پیش کیک، کرغزستان و پاکستان نیامی ایشیاعلاقائی اقتصادی کمکار(کاریک) نا باسک مننگ نا ناطہ ڈیہہ ٹی ٹرانسپورٹ، توانائی، واپاری پالیسی و تخفیف نیزگاری ٹی آسودہی نا چار اولیتی بشخ آتیٹی ہدف آتے دوئی کننگ کیرہ۔

اوداہیت ءِ جمہوریہ کرغزستان نا وزیر اقتصادیات جوشیوارزیبک و زوبیکوچ نا سروکی ٹی پنچ شنبے آ وزیراعظم ہاؤس اٹی اوڑدہی کروک آ ڈل اتون ہیت وگپ کرسا پارے۔ وزیراعظم کرغز ڈل ءِ پارے کہ پاکستان اہم اصلاحاتی پروگرام آ عمل کننگ اٹی ءِ ہرانا مسخت مالیاتی سوگوی، ہندی وسیلہ غاتا تحریک، سبسڈی تے مرحلہ وار چٹفنگ، بجلی و ایلو سرکاری بشخ آتا پوسکن جوڑ و راجی رکھ انا نظام ءِ سوگوی تروئی ءِ۔

اوپارے کہ علاقائی مواصلاتی رابطہ غاتا مون آ دننگ پاکستان نا حکومت نا شونداری حکمت عملی نا ہفت تمبہ غاتیان اسٹ ءِ و حکومت دا گام انا سرگرمی اٹ پیروی ءِ کننگ ءِ ہرا ایشیاٹی شونداری نا مسہ محرک سویلی ایشیا ، چین و نیامی ایشیاءِ ہم آہنگ کننگ نا لائخی تخک۔ ہڑتوم آ کنڈآتا تعلقداری نا بابت ہیت وگپ کرسا وزیراعظم پارے کہ پاکستان کرغزستان حکومت نا شونداری پسند پالیسی تا ستاءِ کیک، پاکستان نا الس کرغزستان نا شونداری ءِ ہرسا خوش ءُ۔

اوپارے کہ کرغزستان و پاکستان نیامی ایشیا علاقائی اقتصادی کمکار(کاریک) نا باسک ءِ و او ڈیہہ ٹی ٹرانسپورٹ ، توانائی، وپاری پالیسی و تخفیف نیزگاری اٹی آسودہی نا چار اولیتی بشخ آتیٹی ”کاریک“ نا ہدف آتے دوئی کننگ کیک۔ وزیراعظم ڈل ءِ پارے کہ پاکستان اٹی بجلی نا کاختی ءِ مر کننگ کن ”کاسا 1000“ نا کڑد اہم ءِ ، داڈٹ است جم وڑاٹ مون آ ہِننگ ءِ و 5آن 8دسمبر 2016ء آ دبئی ٹی اڈ ہلوک آ مشترکہ ورکنگ گروپ نا ساڑی آ دیوان اٹی گڑاس اہم فیصلہ کننگا ہرافتیان ڈٹ انا بروخت پوروی المی مریک۔

اوداہیت آ زورشاغا کہ ہڑتوم آ ملک آتا نیام اٹ جم اٹنگا واپار ناساڑی کچ ءِ پین ودفنگ مریک۔ او اومیت ظاہر کرے کہ پاک کرغزستان مشترکہ وزارتی کمیشن ہڑتوم آ کنڈآتا واپار و اقتصادی تعلقداری تا مون آ دننگ اٹی کمکار ثابت مریک۔ داڑے داہیت ذکر انا قابل ءِ کہ پاک کرغزستان مشترکہ وزارتی کمیشن 1994ء ٹی اڈ ہلکوسس و 2011ء آن 2016ء اسکان ہڑتوم آ کنڈآتا واپار نا کچ 5.57ملین ڈالر سلیس۔