اسلام آباد(پاکستان نیوز پوائنٹ 11جنوری2016ء) پاکستان مسلم لیگ (ن) نا راہشون مریم نواز پارینے کہ بنجائی دارالحکومت اسلام آباد اٹی اسکول آتا اپ گریڈیشن آن پد سرکاری و پرائیویٹ اسکول آتیٹی پرخ مفک۔ چناتے گچین تعلیم فراوان کننگ حکومت نا زمواری ءِ، 2018ء ٹی ہراتم مسلم لیگ (ن) نا حکومت تینا آئینی مد ءِ پورو کرسا کائک تو او پاکستان کن پوسکن ءُ ایجوکیشن سسٹم اس ترسا کائک۔
داخیال آتا درشانی ءِ چارشنبے آ داڑے وزیراعظم تعلیمی اصلاحات پروگرام نا بابت اسکول آتے پوسکن آ بس آتا فراوانی نا دود آن تران کرسا کرے۔ دود اٹی وزیراعظم محمد نواز شریف مہمان خاص ئس وخت اس کہ وزیرمملکت اطلاعات و نشریات و قومی میرات مریم اورنگزیب ، وزیر مملکت کیڈ ڈاکٹر طارق فضل چوہدری ، وزارت کیڈ و ایلو ادارہ غاتا کمامدارآتون اوار اسلام آباد نا کیہی اسکول آتا استاد و طالب علم آتا بھلو کچ اس ساڑی ئس۔
مریم نواز پارے کہ ہراتم نن پرائم منسٹر ریفارم پروگرام نا بناءِ کرین و دابابت کیہی اسکول آتا دورہ ءِ کرین و ہموڑے مر مرآن بروک آ اسپیشل چناو نیاڑی تتون ملان تو اوفک پاریر کہ ننے بس آتا گرج ءِ ، پرائیویٹ ٹرانسپورٹ اٹ نن رکھوک افن، ہراتم ای دابابت وزیراعظم محمد نواز شریف تون درخواست کریٹ تو اوبروک آ دے بس آتا منظوری ءِ تس۔ اوپارے کہ دا پروگرام نا رداٹ اسلام آباد اٹی اسکول آتے کن ٹرانسپورٹ نا آسراتی تے گچین جوڑ کننگ کن 200 بس فراوان کننگ انگ ءِ، بس آتا اولیکو کھیپ اٹی 70 بس بسنو۔
اوپارے کہ بنجائی دارالحکومت اسلام آباد اٹی ہراتم اسکول تا اپ گریڈیشن پورو مریک تو پرائیویٹ و سرکاری اسکول آتیٹی پرخ مفک۔چناتے گچین تعلیم فراوان کننگ حکومت نا زمواری ءِ ۔ ہراتم حکومت 2018ء ٹی تینا اقتدارءِ پورو کرسا کائک تو مچ آ اسلام آباد اٹی پوسکن ءُ اسکول و پوسکن ءُ ایجوکیشن سسٹم اس ترسا کائک۔ اوپارے کہ مسلم لیگ (ن) اسکول آتیٹی معیاری تعلیم و اسکول آتا گچینی کن گام گیج کننگ ءِ۔
