اسلام آباد(پاکستان نیوز پوائنٹ 11جنوری2016ء) وزیراعظم محمد نواز شریف چناتے پاکستان نا آخبت نا معمار گوندسا پارینے کہ ساڑی حکومت پوسکن آ نسل ءِ خاص کر معیاری و جدید تعلیم نا فراوانی آ خصوصی چکار کننگ ءِ نن غٹ اواری اٹ تینا ملک ءِ زیبا، شونہال و سوگو جوڑ کینہ، چناک معصوم و سچا مریرہ قوم انا چناک کنا جان ءُ و کنے اوفتیا فخر ءِ اوفتے ہروڑگچین آسودہی فراوان کننگ کن غٹ تر گام گیج کننگک۔
چارشنبے آ داڑے اسلام آباد اٹی وزیراعظم تعلیمی اصلاحات پروگرام نا رداٹ اسلام آباد نا اسکول آتیٹی طالب علم آتے کن ٹرانسپورٹ نا آسراتی نا بابت پوسکن آ بس آتا فراوانی نا دود آن تران کرسا وزیراعظم محمد نواز شریف پارے کہ چناک پاکستان نا آخبت آک ءُ و آخبت نا معمار آک ءُ ، چناک انشاء اللہ پاکستان ءِ پین سوگو جوڑ کیرہ۔ نن انتس کہ تینا ملک اکن کننگ اُن چناک داکان 100 گناہ زیات کیرہ ہنداخاطران نن خوانہ کہ ہر اسکول زیبا مرے ہموڑے گچین ءُ چاگڑاس مرے و چناتے غٹ تر آسودہی رسینگے۔
وزیراعظم پارے کہ سرکاری اسکول آتیٹی خواننگ نا معیار بایدے گچین مرے ہراتم چناک اسکول آتیٹی داخل مریرہ تو خوش مریوہ۔ اوپارے کہ چناک اسکول آ برسا خوشی محسوس کیر و اسکول آ ہِننگ و بننگ نا وخت بڑزکو معیار نا بس آتیان ہم لطف اندوز مریر۔ وزیراعظم یخین ظاہر کرے کہ نن و نم غٹ اواری اٹ ملک ءِ زیبا جوڑ کینہ و ننے تینا ملک اٹی رہینگسا و پیشن نا ملک اٹی ہِننگ و بننگ نا وخت فخر محسوس مریک۔
اوپارے کہ ای مریم نواز شریف ءِ پارت کریسٹ کہ اسلام آباد نا غٹ 422اسکول آتا ماڑیک گچین مریر وخت اس کہ او اسکول آتیٹی تعلیم نا بست وبند ہم بایدے گچین مرے۔ اوپارے کہ ای دابابت ڈاکٹر طارق فضل چوہدری ءِ ہم پاریسٹ کہ تعلیم نا معیار گچین مرے و چناتے داخلہ میرٹ آ ملے وخت اس کہ تعلیمی ادارہ غاتیٹی استاد آتا تقرری ہم میرٹ آ بایدے مرے و بایدے غٹ کاریمک میرٹ آ مریر۔
اوپارے کہ غٹ اسکول آتے کن اسہ ، اسہ بس لازمی مرے تانکہ چناتے اسکول ہن و براٹی آسراتی دوئی مرے۔ وزیراعظم پارے کہ پروگرام نا رداٹ پین 200 بس آتا ہلنگ نا دمدستی بست بند ءِ کننگے تانکہ چناتے ٹرانسپورٹ نا آسراتی زوت آن زوت فراوان کننگ مرے۔ اوپارے کہ خلقی علاقہ غاتا چناتے دابابت خصوصی اہمیت تننگے۔ وزیراعظم پارے کہ اسلام آباد نا غٹ اسکول آتیٹی ٹرانسپورٹ نا آسراتی بایدے دستیاب مرے و تعلیم نا معیار آ ہم خاص چکار کننگے۔
اوپارے کہ تعلیم نا لحاظ آن اسلام آباد بایدے ملک انا ماڈل سٹی اس جوڑ مرے داکان بیدس اسلام آباد نا بایدے ایلو معاملہ غاتے ہم گچین جوڑ کروئی مرے۔ وزیراعظم پارے کہ میئر اسلام آباد ءِ خصوصی پارت کننگانے کہ شار انا روڈ، سٹریٹ لیٹ آتا گچینی و شار ءِ صاف ستھرا جوڑ کننگ کن خصوصی بست و بند کننگے و اسلام آباد ءِ اسہ صاف ستھرا و ماڈل شار اس جوڑ کننگے۔
اوپارے کہ شار اتون اوار اوار مضافاتی علاقہ غاتیا ہم خصوصی چکار کننگے تانکہ اوفتا ویل آتے چٹفنگ مرے۔ وزیراعظم محمد نواز شریف پارے کہ بہارہ کہونا علاقہ ٹی اسہ بائی پاس اس جوڑ کننگ نا گرج ءِ تانکہ اسکول آ ہن و بر نا وخت چناتا نہادی وخت زیان مف۔ اودا اومیت نا درشانی ءِ کرے کہ بروک آ وخت اٹی اسلام آباد دنیا نا زیبا انگا شارجوڑ مریک۔ اوپارے کہ وزیراعظم ایجوکیشن ریفارمز پروگرام نا رداٹ مریم نواز شریف بنجائی دارالحکومت نا چنکا چناتیا خصوصی توجوہ تننگ ءِ و اسپیشل چناتیا ہم خصوصی چکار کننگک۔
اواسپیشل چناتا کارکڑد نا ستاءِ کرے و دادے قابل قدر گوندا۔ پروگرام نا ایسر اٹی وزیراعظم چناتون اواری اٹ بس انا ماڈل نا تیار کروک خصوصی کیک ءِ ہم کاٹا و اسکول بس آتا کلیت آتے چناتا حوالہ کرے۔ دود اٹی وزیراعظم نا صاحبزادی گودی مریم نواز شریف ، وزیر مملکت اطلاعات ، نشریات و قومی میرات مریم اورنگزیب ، وزیر مملکت کیڈ ڈاکٹر طارق فضل چوہدری و بڑزکو کمامدارآتون اوار ، اسکول آتا چنا، خصوصی چنا، استاد و طالب علم آتا ولمہ و باوہ غاتا بھلو کچ اس ساڑی ئسک۔
