لاہور(پاکستان نیوز پوائنٹ 10جنوری2016ء) صدر مملکت ممنون حسین پارینے کہ پاکستان انسٹی ٹیوٹ آف فیشن ڈیزائن تون بھلو اومیت آک وابستہ ءُ ،دا ادارہ ملکی مصنوعات آتیٹی تخلیقی انداز اٹی ویلیو ایڈیشن کرسا برآمد و ملک انا وقار اٹی ودکی نا ذریعہ جوڑ مننگ کیک۔ اوداہیت ءِ سے شنبے آ لاہور اٹی پاکستان انسٹی ٹیوٹ آف فیشن ڈیزائن نا سینیٹ دیوان آن تران کرسا پارے۔
داوخت آ ہائر ایجوکیشن کمیشن نا چیئرمین ڈاکٹر مختار احمد، سیکرٹری کامرس عظمت علی رانجھا، ممتاز آرکیٹیکٹ نیئر علی داداو سینیٹ نا ایلو باسک آک ہم ساڑی ئسر۔ صدر مملکت دا وخت آ پارے کہ پاکستانی مصنوعات آتے جہانی معیار آ اتنگ کن تخلیقی انداز فکر اختیار کننگ نا گرج ءِ۔ دا چرجوئی ٹی پی آئی ایف ڈی قابل قدر کڑد ادا کننگ کیک۔ اواومیت پاش کرے کہ پاکستان نا دا قومی ادارہ صنعتی بشخ اٹی جدت ودی کرسا اونا شونداری نا ذریعہ جوڑ مریک۔
اوپارے کہ پاکستانی مصنوعات آتیٹی ویلیو ایڈیشن کرسا ہی برآمد آتیٹی ودکی ممکن ءِ،داچرجوئی ٹی جدید جہانی رجحان آتیان آگاہی کن پٹ وپول آ پبی چکار کننگ نا گرج ءِ۔ اودامسخت کن فیشن اینڈ ڈیزائن نا جہانی شہرت یافتہ ادارہ غاتون رابطہ غاتے ودفنگ نا ہم پارت کرے۔ صدر مملکت پارت کرے کہ طالب علم آتے کسبی تربیت تون اوار اوار قومی تاریخی و تہذیبی معاملہ غاتیان آگاہ کننگ کن پبی گام گیج کننگے ۔ سینیٹ داوخت آ پی آئی ایف ڈی نا فنانس رپورٹ و بروک آ مالی سال انا بجٹ نا منظوری ءِ ہم تس۔ صدر مملکت پی آئی ایف ڈی نا طالب علم آتے اسٹائل ایوارڈ ملنگ آ مبارکبادی تس واومیت پاش کرے کہ او ملک انا نیک نامی و ملکی مصنوعات آتیٹی گچینی کن داوڑخواری کرسا کیرہ۔
