اسلام آباد(پاکستان نیوز پوائنٹ 09جنوری2016ء) وزیراعظم محمد نواز شریف نا کماشی ٹی بڑزکو کہول نا دیوان اٹی دہشت گردی و انتہاپسندی ءِ اسُل سگپننگ نا دوٹوک پالیسی نا اعادہ کرسا داہیت ءِ تالان کننگانے کہ قومی پالیسی مسخت آتا دوئی کن ہر کہول آ کوشست آتے برجا تخنگک، فوجی عدالت آک انتہاپسندی و دہشت گردی نا برخلاف بے کچ اہم کڑد ادا کریر ، بنجائی حکومت فوجی عدالت آتے برجاء تخنگ کن آئینی ترمیم آ صلابت نا بناءِ کرینے۔
پاکستان نا خارجہ تعلقداری نا بارواٹی بڑزکو کہول نا دیوان دوشنبے آ ایوان وزیراعظم اٹی اڈ ہلک۔ دیوان اٹی انسدا ددہشت گردی آپریشن تا کمک اٹ دوئی مروک آ سرسہبی تے پین سوگو جوڑ کننگ نا رداٹ داخلی و علاقائی سلامتی حالیت آتا سرجم جاچ ءِ ہلنگا۔ دیوان نا ساڑی مروک آک داخلی امن نا دوئی و اوڑتون اوار اوار خارجہ پالیسی گام گیج آتے سوگوی تننگ کن انتہاپسندی ودہشت گردی ءِ اسُل سگپننگ نا پاکستان نا صفا پالیسی نا اعادہ ءِ کریر۔
دیوان قومی پالیسی مسخت آتا دوئی کن ہرکہول آ کوشست آتے برجاء تخنگ نا عزم انا اعادہ کرے۔ دیوان اٹی داہیت آ زورشاغنگا کہ فوجی عدالت آک انتہاء پسندی و دہشت گردی نا برخلاف یکجا کارروائی نا نازرک موڑآ بے کچ اہم کڑد ادا کریر و ضرب عضب آپریشن نا رداٹ گام گیج آتے بامسخت و ٹھوس قومی فائدہ غاتیٹی بدل کریر۔ بنجائی حکومت داخہ وخت اکن ہراڑآ پارلیمنٹ اٹی نمائندگی نا حامل غٹ سیاسی جماعت آک امنا مریر، فوجی عدالت آتے برجا تخنگ کن آئینی ترمیم آ صلابت نا بناءِ کرینو۔
ساڑی مروک آک امنا کریر کہ پاکستان داخلی امن نا دوئی و پرامن ڈیہہ کن تینا مناسب کڑد ءِ ادا کننگ کن کوشست آتے برجاء تخک۔ دیوان اٹی وزیر خزانہ محمد اسحاق ڈار ، وزیر داخلہ چوہدری نثارعلی خان، چیف آف آرمی اسٹاف جنرل قمر جاوید باجوہ ، ڈی جی آئی ایس آئی لیفٹیننٹ جنرل نوید مختار ، وزیراعظم نا سلاہکار خارجہ امور سرتاج عزیز ، وزیراعظم نا خصوصی کمکار طارق فاطمی، قومی سلامتی سلاہکار لیفٹیننٹ جنرل (ر) ناصر خان جنجوعہ ، وزیراعظم نا سیکرٹری و ایلو سینئر کمامدارآک ساڑی ئسر۔
