اسلام آباد(پاکستان نیوز پوائنٹ 09جنوری2016ء) جہانی امور نا چاہندار ڈاکٹر فاروق احمد پارینے کہ بھارت نا حکومت دہشت گردی نا زی آ برسراقتدار بس و مقبوضہ کشمیر اٹی ہم ہمورویہ ءِ تینا کرینے ۔ احوالکار آتون ہیت وگپ کرسا اوپارے کہ بھارت مقبوضہ کشمیر اٹی بیدادی و انتہاپسندی نا حدآتے گدریفینے، وادی ءِ کشمیر ہندن ءُ علاقہ اس ئس ہراڑے ہندو و مسلم و سکھ اسہ جاگہ پرامن وڑاٹ زند ءِ تدیفیرہ و ہموجاگہ نا خلقت نا حق خودارادیت سیکولر بنداو تیا مون آہِننگ کریکہ ہراڑآن ہر مذہب نا خلقت فائدہ دوئی مننگ کریکہ۔
اوپارے کہ بھارت وادی ٹی بیدادی ءِ کاٹم آن گدریفسا خلقت آن نقل وحرکت ، حق اظہاررائے و میڈیا غا پابندی خلسا منافرت تالان کرینے ہنداسوب ءِ کہ کشمیری ورناک گدرینگوک آ مسہ توآن تحریک ءِ چلیفنگ ءُ و اوفتا پاننگ ءِ کہ داسہ حق خودارادیت ءِ دوئی کننگ آن بیدس آرام اٹ تولپنہ۔ سرفراز احمدپارے کہ بھارتی فوج نا دوتے اٹ داوخت اسکان سد آ بندغ شہید و بے کچ ٹھپی و نابینا مسنو۔
اوپارے کہ مچ آ دنیاٹی ہراڑے ہم فوج نیام تمک ہموڑے انسانی حق انا پامالی مریک ہرانا سوب خار و خوف زیات مریک و ہراوڑخار و نفرت ودک ہموڑے چٹک ہم۔ مقبوضہ کشمیر نا بابت پاکستان نا موقف آ چست کروک آ سوج انا ورندی ءِ ترسا اوپارے کہ پاکستان کشمیری تا اخلاقی ، سفارتی و سیاسی مخ تفی ءِ برجاتخانے و پاکستان نا گچین سفارت کاری نا سوب کشمیر ناویل مچ آ دنیا ٹی تالان مسنے و وزیر اعظم محمد نواز شریف نا اقوام متحدہ ٹی کروک آ تران اٹی ہم دا ویل ءِ پرزور و گچین وڑاٹ پیش کرینے۔
اوپارے کہ داسہ دنیا تون اوار انسانی حق انا تنظیم و اقوام متحدہ ہم دا ویل انا نوٹس ہلکونے ہراڑآن بھارت دنیا ٹی بدنام مرسا سلیسنے۔ اوپارے کہ داسہ بھارت ءِ مرے کہ او بیدادی ءِ بند کے و کشمیری تے اقوام متحدہ نا قرارداد آتا رداٹ حق خودارادیت ایتے۔
