اسلام آباد(پاکستان نیوز پوائنٹ 09جنوری2016ء) چین پاکستان اقتصادی راہداری نا شش می اسیجائی کمکار کمیٹی (جے سی سی) گوادراٹی اہم ڈٹ آتیٹی گوادر پورٹ نا اپ گریڈیشن ، ایکسپریس وے ، گوادر انٹرنیشنل ایئر پورٹ و گوادر فری زون و پورٹ ڈویلپمنٹ تون اوار کیہی ڈٹ آتا منظوری ءِ تسنے ہراڑآ گڑاس ڈٹ آتیا کاریم اینخو سال مارچ اٹی بناء کیک وخت اس کہ کیہی ڈٹ آتیا کاریم ترندی اٹ برجاءِ۔
وزارت ڈٹ بندی و شونداری نا ذرائع اے پی پیءِ پارے کہ بنجائی حکومت اینخو مالی سال اٹی چین پاکستان اقتصادی راہداری کن سرکاری بشخ انا شونداری پروگرام بھلو زراس خڑچ کرینے، حکومت مالی سال نا بجٹ اٹی چین پاکستان اقتصادی راہداری نا ڈٹ ءِ خصوصی اہمیت تننگ ءِ تانکہ اونا پوروی آن ملک انا اقتصادی و معاشی شونداری و شونہالی نا ہدف آتیٹی کمک دوئی کننگ مرے۔
اوپارے کہ گوادر بندرگاہ نا استطاعت ودفنگ کن گوادر اپ گریڈیشن ڈٹ ہراٹی ساڑی آ کثیر المسخت ٹرمینل نا ودیکی و ایسٹ بے ایکسپریس وے ، گوادر ایئر پورٹ آ کاریم ترند کننگ تون اوار اوار گوادر اٹی واٹر سپلائی اسکیم آ دمدستی کاریم نا بناء کننگ آ ہم اتفاق کننگانے۔ گوادر شار ءِ ڈٹ بندی نا رداٹ جوڑ جاڑ کننگ کن گوادر ماسٹرپلان ءِ پورو کننگ نا پارت کننگانے۔
اوپارے کہ جے سی سی گوادر اٹی مسہ سد میگاواٹ بجلی ڈٹ انا منظوری آ است جمی نا درشانی ءِ کرے۔ بجلی نا گرج آتے پورو کننگ کن کولاآن چلینگوک آ دا ڈٹ آ 31مارچ آن مست بناء کیک۔ اوپارے کہ گوادر فری زون وپورٹ ڈویلپمنٹ نا کیہی ڈٹ و گوادر ووکیشنل انسٹی ٹیوٹ نا جوڑ جاڑی کاریم ءِ پین ترند کننگ نا فیصلہ کننگا۔ گوادر فری زون اٹی زرکاری نا چرجوئی بناء کرینے ہراڑے سٹیل، پٹرو کیمیکلز و ایلو صنعت آتا اڈتننگ آ کاریم نا بناء کرینے۔
اوپارے کہ سوشل سیکٹر ڈویلپمنٹ نا رداٹ چین نا کنڈآن گوادر ہسپتال ءِ 150بیڈز اسکان اپ گریڈیشن، تعلیم نا بشخ اٹی پین کاریم کننگ، گوادر یونیورسٹی تون صف اول نا چینی یونیورسٹی نا کمکاری نا بابت فیصلہ مسنے، چینی یونیورسٹی گوادر یونیورسٹی تون اواری اٹ میرین و میری ٹائم تون اوار اوار ایلو بشخ آتیٹی کمک فراوان کیک۔ اوپارے کہ گوادر نا ماہی گیر و کشتی جوڑ کروک آتا روزگار کن کاریم کیر و اوفتے رکھ فراوان کننگے۔
